23 mln tonnadan astamdy qurady.
Qazaqstan men Qytaı arasyndaǵy temirjolmen júk tasymaldaý 2022 jyly rekordtyq kórsetkishke jetip, 23 mln tonnadan astamdy qurady. Bul týraly «Qazaqstan temir joly» UK» AQ baspasóz qyzmeti málimdedi, dep habarlaıdy Almaty-akshamy.kz QazAqparatqa silteme jasap.
Bul san 2021 jylmen salystyrǵanda 15%-ke kóp. Bul rette qazaqstandyq kásiporyndardyń eksporttyq jóneltilimderi: temir keni (+17%), tústi ken (+45%), qara metaldar (+6%), konteınerlerdegi astyq júkteri (+70%) jáne basqa da júkter (+83%) ónimderin tasymaldaýdyń ósýi esebinen 17%-ke ulǵaıdy.
«Joǵary kórsetkishterge eki el temirjolshylarynyń úılesimdi jumysy esebinen qol jetkizildi. «QTJ» UK» AQ men Qytaı temirjol ákimshilikteri birlesip poıyzdardy kedergisiz qabyldaý-berýdi, ótkelderdiń qýatyn tıimdi paıdalanýdy qamtamasyz etý boıynsha jumys júrgizdi. Almaty júk tasymaldaý bólimshesiniń, Dostyq jáne Altynkól stansıalarynyń temirjolshylary júkterdi qabyldaý-tapsyrý boıynsha jumysty naqty jáne ýaqtyly uıymdastyra alatyndyǵyn kórsetti», - dep jazdy vedomstvodan.
Qytaı baǵytynda júkterdi tasymaldaýǵa suranystyń artýyn eskere otyryp, temirjol ınfraqurylymyn jedel damytý boıynsha sharalar qabyldanýda.
Otandyq ónimdi úzdiksiz tasymaldaýdy qamtamasyz etý jáne eldiń tranzıttik áleýetin damytý úshin ótken jyldyń qarasha aıynda Dostyq-Moıynty ýchaskesinde ekinshi joldardyń qurylysy bastaldy. Jobany iske asyrǵannan keıin ýchaskeniń ótkizý qabileti 5 esege (júk poıyzdarynyń 12 jubynan táýligine 60 jupqa deıin) artady. Qazirgi ýaqytta Aıagóz-Baqty úshinshi temirjol shekara ótkelin salý boıynsha tehnıkalyq-ekonomıkalyq negizdeme ázirlenýde.
Osy iri ınfraqurylymdyq jobalardy iske asyrý Qazaqstan ekonomıkasynyń damýyna serpin beredi jáne elder arasyndaǵy júk aǵynyn arttyrýǵa qyzmet etedi.