Úıdiń murjasy bitelip qalǵan.
4 qańtarda Almaty oblysy, Kegen aýdany, Kegen aýylynda kóp qabatty turǵyn úıde 4 adam peshten shyqqan tútinge ýlanyp qaldy, dep habarlaıdy Almaty-akshamy.kz QR Tótenshe jaǵdaılar mınıstrligi baspasóz qyzmetine silteme jasap.
Tótenshelikterdiń málimetinshe, murja bitelip qalǵandyqtan, tútin shyǵyp, áıel adam men úsh bala sol tútinge ýlanǵan.
«1997 jyly týǵan áıel men 2019, 2020 jáne 2022 jyly týǵan úsh bala aýrýhanaǵa jatqyzyldy. Jaǵdaılary ortasha aýyrlyqta», - delingen TJM baspasóz qyzmeti taratqan aqparatta.
Tótenshelikter ýlanýdyń jáne adam óliminiń aldyn alý maqsatynda turǵyndarǵa úıdiń, páterdiń órtke qarsy jaı-kúıin tekserýge, pesh jáne elektr symdary men elektr aspaptarynyń jaramdylyǵyna erekshe nazar aýdarýǵa shaqyrdy. Eger qandaı da bir kemshilikter tabylsa, olardy dereý joıý kerek.