Qabyldaýdy apattar medısınasynyń bilikti dárigerleri júrgizýde.
Qazaqstan Tótenshe jaǵdaılar mınıstrliginiń dárigerleri Túrkıa Respýblıkasynyń Gazıantep qalasynda medısınalyq kómek kórsetý pýnktin ashty dep habarlaıdy Almaty-akshamy.kz TJM-niń baspasóz qyzmetine silteme jasap.
Málimetter boıynsha, joıqyn jer silkinisinen keıin izdestirý-qutqarý jumysyn júrgizý úshin Túrkıaǵa jiberilgen Qazaqstan qutqarýshylarynyń quramynda Apattar medısınasy ortalyǵynyń mamandary bar.
Dárigerler alǵashqy medısınalyq-sanıtarlyq kómek kórsetý úshin pnevmokarkasty modýl ornatty. Ol – turǵyndarǵa bilikti kómek kórsetýge arnalǵan dalalyq medısınalyq pýnkt. Qabyldaýdy apattar medısınasynyń bilikti dárigerleri júrgizýde.
«Gazıantep qalasynyń turǵyndaryn táýlik boıy qabyldaý barysynda Apattar medısınasy ortalyǵynyń dárigerleri jıyrmaǵa jýyq naýqasqa, olardyń ishinde eki balaǵa konsýltasıalyq jáne bilikti medısınalyq kómek kórsetti. Adamdar osy pýnktke kóbinese jylynýǵa, týystary men jaqyndaryn qutqarýshylar taýyp alǵansha kútýge keledi. Óıtkeni kópshiligi baspanasyz qaldy.
TJM pnevmokarkas modýlderin ótken jyly satyp alǵanyn atap ótken jón. Atalǵan dalalyq medısınalyq gospıtál iri zilzalalar men apattar týyndaǵan kezde ornalastyrýǵa arnalǵan. Mundaı mobıldi aýrýhana tolyq ornalastyrylǵan kezde kúnine 200-ge jýyq zardap shekken adamdy qabyldaı alady.
Óz ómirin qaýip-qaterge tigip, Túrkıadaǵy zilzala ornynda aýyr jaǵdaıda qyzmet atqaryp jatqan qutqarýshylardyń da densaýlyǵyn saqtaý - TJM medısına qyzmetkerleriniń basty mindetteriniń biri. Dárigerlerdiń aıtýynsha, búgingi kúni Túrkıadaǵy TJM jeke quramynyń densaýlyǵy jaqsy, olar psıhologıalyq turǵydan saý», - delingen mınıstrlik málimetinde.