Úkimette jastar saıasaty jáne bilim berý salasyn damytý jobalary qaraldy.
2029 jylǵa qaraı 2,3 mıllıon jasty jumyspen qamtý josparlanyp otyr. Bul týraly búgin Premer-Mınıstr Álıhan Smaıylovtyń tóraǵalyǵymen ótken keńeste aıtyldy, dep habarlaıdy Almaty-akshamy.kz QR Úkimetiniń Telegram-kanalyna silteme jasap.
Keńeste jastar saıasaty jáne mektepke deıingi, orta, tehnıkalyq jáne kásiptik bilim berýdi damytý tujyrymdamalarynyń jobalary qaraldy.
Aqparat jáne qoǵamdyq damý mınıstri Darhan Qydyráli Jastar saıasaty tujyrymdamasynyń jobasy 6 baǵyt pen 10 nysanaly ındıkatordy jáne 72 is-sharany qamtıtynyn aıtty.
«Biz 2029 jylǵa qaraı memlekettik qoldaý sharalary týraly jastardyń habardarlyǵyn 90% deıin, volonterlik, qaıyrymdylyq jáne ekologıalyq bastamalarǵa tartylý deńgeıin 32% deıin arttyrýdy kózdep otyrmyz», — dedi D. Qydyráli.
Sonymen qatar Tujyrymdama jobasy jas kásipkerlerdiń úlesin 30% deıin, jumyspen qamtý ortalyqtaryna júgingender arasynan jumysqa ornalastyrylǵan jastardyń úlesin 61% deıin ulǵaıtýdy kózdeıdi.
2029 jylǵa qaraı 2,3 mıllıon jasty jumyspen qamtý josparlanýda, onyń 1 mıllıony – aýyl turǵyndary. Sonymen qatar aýyldyq jerlerde turatyn 1,5 mıllıon jas qazaqstandyq sıfrlyq saýattylyqqa oqytylatyn bolady.
Tehnıkalyq jáne kásiptik bilim berý júıesinde qazaqstandyq jastardyń kolejderde suranysqa ıe mamandyqtar boıynsha tegin bilim alýyna basa nazar aýdaryldy.