Qazaqstan quramasy Túrkistan ótken «Turan barysy» Azıa kýbogynyń jeńimpazy atandy, dep habarlaıdy Almaty-akshamy.kz Inform.kz-ke silteme jasap.
Búgin Túrkistan qalasynda alǵash ret qazaq kúresinen «Turan Barysy» Azıa kýbogy ótti. Jarysqa Túrki memleketteri uıymynyń músheleri – Qazaqstan, Túrkıa, Ózbekstan, Ázerbaıjan, Qyrǵyzstan jáne Majarstan balýandary qatysyp, ózara myqtyny anyqtady.
Balýandar eki topqa bólinip, jeti salmaq sanatynda aınalmaly júıede kúresti. Eki toptan iriktelgen Qazaqstan, Ázerbaıjan, Qyrǵyzstan jáne Ózbekstan qurama komandalary júldeli oryndarǵa talasty.
Ázerbaıjan eliniń ókilderin qapy qaldyrǵan qyrǵyz órenderi qola júldeni ıelendi. Al tartysqa toly kúres básekesiniń aqtyq aıqasy Qazaqstan men Ózbekstan quramalary arasynda ótti. Aıtýly dodanyń aqtyq básekesinde 4:3 esebimen Qazaqstan balýandary jeńiske jetip, «Turan Barysy» dodasynyń chempıony atandy.
Alǵash ret uıymdastyrylǵan kúres saıysynda birinshi oryn alǵan komanda 10 000 000 teńge kóleminde qarjylaı syılyq alsa, ekinshi orynǵa — 6 000 000, úshinshi orynǵa — 4 000 000 teńge tabystaldy. Sondaı-aq jeńimpaz komandalarǵa kýbok retinde Túrkistan sımvoly – Taıqazan berildi.
Aıta keteıik, is-shara QR Mádenıet jáne sport mınıstrligi men Túrkistan oblysy ákimdiginiń, sondaı-aq «Qazaq kuresi» qaýymdastyǵynyń, «Qazaqstan Barysy» qazaq kúresin qoldaý jáne damytý qorynyń uıymdastyrýymen ótti.
