15-17 qazan aralyǵynda Grekıanyń Salonıkı qalasynda sambodan jastar men jasóspirimder arasynda ótken álem chempıonda Qazaqstan quramasy úshinshi oryn aldy, dep habarlaıdy almaty-akshamy.kz
Básekeniń sońǵy kúni 10 salmaqta júlde jıyntyǵy sarapqa salynyp, qazaqstandyqtar sonyń altaýynda medal jeńip aldy. 80 keliden joǵary salmaqta Aıda Toıshybekova fınalda reseılik Alısa Pavlovany aıqyn basymdyqpen jeńip, chempıon atandy. Osydan keıin 79 kelide synǵa túsken Almas Ýálı fınalda reseılik Ilá Zatylkınmen kúsh synasyp, qarsylasyna jol berdi. Sondaı-aq Gúlzıra Qudasbek (59 kg), Arýjan Satova (65 kg), Beksultan Dúısenov (71 kg), Ajar Asqat (80 kg) qola júldege ıe boldy.
Jalpykomandalyq esepte jastar quramasy uldar men qyzdar arasynda Reseı men Ózbekstannan keıin úshinshi orynǵa jaıǵasty.
Esterińizge sala keteıik, álem chempıonatynyń alǵashqy kúni qazaqstandyq samboshylar 3 júldege qol jetkizgen. Aman Baqytjan 58 kelide aqtyq synda ýkraınalyq Maksım Babıchten basym túsip, chempıon boldy. Al Nýrılá Asanqyzy (+80 kg) men Aldıar Qaraǵulov (53 kg) úshinshi oryn aldy. Ekinshi kúni uldar arasynda 88 kelidegi Qudiret Dosymov aqtyq synda reseılik Maksım Merjlákovqa, qyzdar arasynda (59 kg) Aqtoty Zárip ýkraınalyq Sofıa Bordınskıhke ese jiberip, kúmis júldeger atandy. Al Aıkún Rahmetova (50 kg), Álpesh Izenbaı (54 kg), Nurym Qaırollın (58 kg), Esentaı Imahanov (64 kg), Anel Qaıratqyzy (65 kg) qola medalge ıe boldy.