Ońtústik Koreıanyń Cholla provınsıasynda ótken koreı kúresinen álem chempıonatyna 10 eldiń sportshylary qatysty. Bul týrnırde 140 kelige deıingi salmaq dárejesinde beldesý ótti. Qazaqstan quramasynyń namysyn qazaq kúresiniń chempıondary Qaısar Shamshıdın men Altynbek Aýsaǵıtov qorǵady, dep habarlaıdy aqshamnews.kz
Qaısar Shamshıdın týrnırde alǵashqy eki beldesýinde qarsylastaryn jeńip, biraq úshinshi kezdesýde ıspanıalyq Raýl Mensege ese jiberdi. Qaısardyń aıtýynsha, jańa kúres túrine úırený ońaı bolmady.
"Endi birinshi ret kúresken soń sál yńǵaısyzdaý. Erejesin durys bilmeımiz áli, qalaı kúresý kerek, ne isteý kerek, barlyǵyn túsiný qıyn boldy. Ózimiz qazaq kúresimen kúresemiz, onda bizde arnaıy matrasymyz bar, al olar qumnyń ústinde kúresedi. Sondyqtan kishkene yńǵaısyz boldy", — dedi Qaısar Shamshıdın.
Bul koreı kúresiniń alǵashqy halyqaralyq chempıonaty 2011 jyly ótken bolatyn. Koreı kúresiniń ereksheligi — sportshylar qumda, syrt kıimsiz beldesedi, bul kúrestiń ózindik qıyndyqtary men erekshelikterin týǵyzady. Qazaqstan bul chempıonatqa tórtinshi ret qatysyp otyr.
Qazaqstan quramasynyń bapkeri Chan Re Hvan eki kún ǵana daıyndyqpen týrnırge shyqqan sportshylar jaqsy nátıje kórsetti dep baǵalady.
"Qazaqstandyq sportshylarmen eki kún ǵana daıyndaldyq, sondyqtan olardyń kórsetken nátıjeleri jaqsy dep oılaımyn. Qazaq kúresi men koreı kúresi ssırymnan múldem ózgeshe. Men ózim Dúnıejúzilik kóshpendiler oıyndaryna qatysqan kezde qazaq kúresi boıynsha týrnırde tehnıkanyń jetispeýshiliginen biraz qıyndyqtar týyndaǵan edi", — dedi bapker.
Bıylǵy jarysta qazaqstandyq palýandar jergilikti turǵyndarǵa qazaq kúresi erejelerimen tanystyrdy, bul mádenı jáne sporttyq almasý úshin úlken múmkindik boldy.