Oıyn baǵdarlamasyna 50-ge jýyq sport túri engen.
29 qyrkúıek pen 4 qazan aralyǵynda Túrkıanyń Iznık qalasynda IV Dúnıejúzilik kóshpendiler oıyndary ótedi. Oǵan Qazaqstan quramasy kókpar, jamby atý, qazaq kúresi, dástúrli sadaq atý sekildi sport túrlerinen qatysady. Teńge ilý men aýdaryspaq sportshylary kórsetilim jasaıdy. Bul týraly Ortalyq komýnıkasıalar qyzmetinde ótken brıfıńte Sport jáne dene shynyqtyrý komıtetiniń tóraǵasy Samat Erǵalıev aıtty, dep habarlaıdy Almaty-akshamy.jz Inbusiness.kz silteme jasap.
«Dúnıejúzilik kóshpendiler oıyndary – túrki áleminiń ortaq qundylyqtaryn álemge pash etip, kóshpendiler murasyn nasıhattaýda úlken joba bolyp kele jatqan sporttyq shara» - dedi komıtet basshysy.
Spıkerdiń aıtýynsha, oıyn baǵdarlamasyna 50-ge jýyq sport túri engen. Bul sharaǵa qazaq kúresinen tuńǵysh ret Qazaqstan áıelder quramasy saıysqa túsedi.
«Saıys Túrkıanyń Iznık qalasynda ótedi. Oǵan Qazaqstan atynan jalpy 80-ge jýyq delegat qatysady. Onyń ishinde 49 sportshy bar. Bul sportshylardyń 50 paıyzy memleket bólgen qarjy esebinen, al qalǵan 50 paıyzy uıymdastyrýshy taraptyń esebinen barady. Sonymen qatar, biz qazaq kúresinen tuńǵysh ret áıelder qurama komandasyn da alyp bara jatyrmyz. 3 sportshy áıel bolady», - dep atap ótti Samat Erǵalıev.