Germanıanyń Essen qalasynda sokkadan álem chempıonatynyń fınaldyq machy ótti.
Onda Qazaqstan men Ýkraına quramasy bas júldege talasty, dep habarlaıdy Almaty-akshamy.kz Sports.kz-ke silteme jasap.
Sokka – shaǵyn fýtboldyń bir túri. Aıyrmashylyǵy oıynshy sany men alańnyń kóleminde. Mach 20 mınýttan eki taım bolady jáne ár komandada 6 oıynshydan qatysady.
Bul oıyndy revansh dep te ataýǵa bolady. Sebebi komandalar 2023 jylǵy álem chempıonatynyń toptyq kezeńinde kezdesip, onda Ýkraına 6:2 esebimen basym túsken edi.
Onynshy mınýtta Abaı Elemesov qazaqstandyqtardy alǵa shyǵarsa, 14-mınýtta Altynbek Myrzabekov esepti eseledi. 18-mınýtta qarsylas komanda oıynshysy Andreı Melnık alǵashqy golyn soqsa, 37-mınýtta dúbl avtory atanyp, esepti teńestirdi.
Machtyń negizgi ýaqyty teń aıaqtalyp, oıyn býllıt serıasymen jalǵasty. Onda qazaqstandyqtar 2:1 esebimen jeńiske jetti. Qorytyndy esep – 4:3. Osylaısha, Qazaqstan quramasy óz tarıhynda alǵash ret sokkadan álem chempıonatynyń altyn medalin ıelendi. 2022 jyly ulttyq komanda fınaldyq machta Brazılıadan 0:3 esebimen jeńilip, «kúmisti» qanaǵat tutqan bolatyn.