Marıan Ýrdabaeva jıý-jıtsýdan Azıadanyń qola júldesin jeńip aldy
Hanchjoýda ótip jatqan jazǵy Azıa oıyndarynda jıý-jıtsýdan áıelder arasyndaǵy 63 kg salmaqta eki qazaq sportshysy kúresip, qola júldege talasty, dep habarlaıdy QR Týrızm jáne sport mınıstrligi Sportty damytý dıreksıasynyń baspasóz qyzmeti.
Marıan Ýrdabaeva pen Ajar Salyqova arasyndaǵy jekpe-jek alǵashqysynyń senimdi jeńisimen aıaqtaldy. Esep: 7-0. Osylaısha, Qazaqstan delegasıasynyń qorjynyna 70-shi, sonyń ishindegi 42-shi qola medal tústi.
Marıan búgin irikteýde Mońǵolıa jáne Fılıppın sportshysynan aılasyn asyrǵanymen, jartylaı fınalda Ońtústik Koreıadan kelgen qarsylasyna 2-9 esebimen jol jiberdi.
Marıan Ýrdabaevany qazaq jankúıerleri dzúdoshy retinde de jaqsy biledi. Ol 2010 jylǵy Gýanchjoýdaǵy Azıadada dzúdodan 70 kg deıingi salmaqta baq synap, qola júlde úshin beldesýde qarsylasyna ese jibergen. Al 2014 jyly Inchhonda jekeleı (63 kg) jáne komandalyq synda qola júldege ıe bolǵan. Tájirıbeli sportshy dzúdodan 2016 jylǵy Azıa chempıony (Tashkent, 63 kg), 2 dúrkin qola júldegeri (Kýveıtte 2007 jáne 2015 jyly).
Al jıý-jıtsýdan álem chempıonatynda 2 márte úzdik úshtikti túıindep, 2021 jyly Abý-Dabıde ótken Azıa chempıonatynda kúmis medalge ıe bolǵan.