Ulttyq qordan satý úlesi saýda-sattyqtyń jalpy kóleminiń 25,3% qurady.
Shilde aıynda Ulttyq qordan respýblıkalyq búdjetke transfertterdi qamtamasyz etý úshin 599,2 mln AQSH dollary satyldy, dep habarlaıdy Almaty-akshamy.kz
Shildede Ulttyq bank valútalyq ıntervensıalardy, sondaı-aq biryńǵaı jınaqtaýshy zeınetaqy qory men senimgerlik basqarýdaǵy basqa da qorlardyń zeınetaqy aktıvteri úshin shetel valútasyn satyp alý nemese satý operasıalaryn júrgizgen joq.
«Shildeniń qorytyndysy boıynsha, teńge baǵamy 1 dollar úshin 477,07 teńgege deıin kóterilip, 1,5%-ǵa ózgerdi. Qazaqstan qor bırjasyndaǵy saýda-sattyqtyń ortasha kúndik kólemi bir aıda 96,4 mln AQSH dollarynan 118,6 mln AQSH dollaryna deıin ulǵaıdy. Shildede saýda-sattyqtyń jalpy kólemi 2,4 mlrd AQSH dollaryn qurady. Valúta naryǵyna kvazımemlekettik sektor sýbektileriniń valútalyq túsimdi satýy qoldaý kórsetti. Olar shamamen 543,9 mln AQSH dollaryn qurady», - delingen Ulttyq banktiń habarlamasynda.
Ulttyq banktiń habarlaýynsha, kvazımemlekettik sektor kompanıalary ekinshi deńgeıli bankter arqyly valúta naryǵynda saýdany derbes júzege asyrady.
«Shildede Ulttyq qordan respýblıkalyq búdjetke transfertterdi qamtamasyz etý úshin shetel valútasyn satý 599,2 mln AQSH dollaryn qurady. Ulttyq qordan satý úlesi saýda-sattyqtyń jalpy kóleminiń 25,3% qurady», - delingen aqparatta.