Almatynyń Qala qurylysyn baqylaý basqarmasynyń málimetinshe, «Qazaqstan» qonaq úıiniń janyndaǵy sýburqaqty qaıta jańartý boıynsha qurylys-montaj jumystary ruqsatsyz júrgizildi, dep habarlaıdy almaty-akshamy.kz
«Nysanda jumys toqtatyldy, «Crown Star» JSHS menshik ıesine qatysty jospardan tys tekseris nátıjesinde buzýshylyqtardy joıýǵa nusqama bere otyryp, QR ÁQBtK-niń 316-baby 1, 321-bóligi boıynsha sharalar qabyldandy. Búginde basqarma uıǵarymdy májbúrli oryndaý úshin sotqa talap aryz beredi», - delingen vedomstvo habarlamasynda.
Almaty qalasy mádenıet basqarmasynyń habarlaýynsha, qonaq úıdiń janynda kórsetilgen sýburqaq eskertkish bolyp tabylmaıdy, alaıda ol kúzet aımaǵynyń aýmaǵynda ornalasqan:
«Qazaqstan» qonaq úıiniń ǵımaraty Almaty qalasy ákimdiginiń 2021 jylǵy 17 naýryzdaǵy qaýlysyna sáıkes, Almaty qalasynyń jergilikti mańyzy bar tarıh jáne mádenıet eskertkishteriniń memlekettik tizimine engizildi. Osyǵan baılanysty, nysan aýmaǵynda qandaı da bir qurylys nemese jańartý jumystaryn júrgizý úshin menshik ıesine tıisti ǵylymı-jobalaý qujattamasyn daıyndaý jáne ǵylymı-restavrasıalaý jumystar júrgizý qajettiligin negizdeý qajet. Alaıda bul oryndalmady, ǵımarattyń ıesi basqarmaǵa júginbedi».
Bıyl sáýirde Mádenıet basqarmasynyń qyzmetkerleri shaǵym túsken nysandy tekserip, «Crown Star» JSHS qonaq úı ıesinen kúzet aımaǵynyń aýmaǵynda qurylys jumystaryn toqtatýdy jáne buzýshylyqtardy joıýdy talap etti. Buǵan qosa, 2024 jyly 24 mamyrda Almaty qalasy Medeý aýdanynyń prokýratýrasyna qonaq úı ıesin jaýapkershilikke tartý týraly suraý jiberildi.