Memleket basshysy Erbolat Dosaevty qabyldady
Memleket basshysy Ulttyq bank tóraǵasynyń bıylǵy 9 aı ishindegi aqsha-nesıe saıasatyn júzege asyrýdyń aldyn ala qorytyndylary týraly, álemdik ekonomıkany qaıta qalpyna keltirýdiń qarqyny jáne ony pandemıaǵa deıingi deńgeıge jetkizý, sondaı-aq damyǵan elderdegi ortalyq bankterdiń aqsha-nesıe saıasatyn kúsheıtýge kóshe bastaǵany jóninde esep berdi, dep habarlaıdy Almaty-akshamy.kz Aqordanyń resmı saıtyna silteme jasap.
Erbolat Dosaev Prezıdentke qyrkúıek aıynda jyldyq ınflásıanyń 8,9 paıyzǵa deıin qarqyn alǵany jaıynda baıandady. Aılyq ınflásıanyń artýyna aqyly qyzmetter, sonyń ishinde, eń aldymen bilim berý jáne turǵyn úılerdi jalǵa alý salalary úlken úles qosty.
Qasym-Jomart Toqaevqa Ulttyq banktiń Úkimetpen birlesip júzege asyryp jatqan ınflásıaǵa qarsy keshendi sharalary jáne ınflásıany boldyrmaý jónindegi monetarlyq saıasattyń negizgi baǵyttary týraly málimet berildi. Áleýmettik mańyzy bar azyq-túlik taýarlaryna qatysty baǵa bıylǵy tamyz aıyndaǵy 10,4 paıyzdan qyrkúıekte 9,6 paıyzǵa deıin tómendegeni atap ótildi.
Ulttyq bank tóraǵasynyń málimeti boıynsha, shıkizat taýarlary baǵasynyń qymbattaýyna, tutynýshylar tarapynan týyndaǵan shekteýlerge baılanysty álemdegi tutyný baǵalary eń joǵary deńgeıde saqtalyp otyr. Kezdesý barysynda jyl sońyna deıin jáne 2022 jylǵa arnalǵan energıa tasymaldaýshylar baǵasyna qatysty boljamdar usynyldy.
Prezıdentke Ulttyq banktiń altyn-valúta rezervteri men Ulttyq qor aktıvteriniń jaı-kúıi, sondaı-aq valúta naryǵyndaǵy ahýal jóninde baıandaldy.
Sonymen qatar Memleket basshysynyń tapsyrmalaryn oryndaý aıasynda Ulttyq tólem júıesin damytýdyń jáne sıfrlyq bıometrıalyq sáıkestendirýdiń ulttyq platformasyn qurýdyń aldyn ala nátıjeleri týraly málimet berildi.