Qazaqstan Prezıdenti qonaqjaılyq kórsetkeni jáne TMD-ǵa tóraǵalyq etý barysynda Qyrǵyzstannyń tabysty jumys atqarǵany úshin Sadyr Japarovqa alǵys aıtty, dep habarlaıdy almaty-akshamy.kz.
Memleket basshysy TMD janyndaǵy Seriktes jáne Baqylaýshy mártebesiniń bekitilýin búgingi otyrystyń aıtýly oqıǵasy retinde atap ótip, bul sheshim Uıymnyń kemeline kelgenin jáne ony damytýdyń jańa kezeńine qadam basqanyn kórsetetinine nazar aýdardy. Qazaqstan Prezıdenti geosaıası qaıshylyqtardyń shıelenise túskenin atap ótip, álem ekonomıkasynda turaqsyzdyq kúsheıgenin aıtty.
– Qazaqstan jahandyq saýda-sattyq pen memleketterdiń ál-aýqatyna keri áser etetin ekonomıkalyq sanksıalardy qoldanýǵa túbegeıli qarsy, – dedi Memleket basshysy.
Sonymen qatar Prezıdent Taıaý Shyǵystaǵy qazirgi ahýalǵa qatysty pikir bildirdi
– Qazaqstan halyqaralyq ózekti problemalardy sheshý úshin lańkestik ádisterdi qoldanýǵa múldem qarsy. Ondaǵan jyl boıy sheshimin tappaı kele jatqan mindetterdi júzege asyrý úshin beıbit azamattarǵa zorlyq-zombylyq kórsetip, terrorlyq aksıalar jasaýǵa bolmaıdy. Bul – esh aqtaýǵa kelmeıtin áreket, – dedi Prezıdent. Sonymen qatar Qasym-Jomart Toqaev Qazaqstannyń halyqaralyq qatynastarda ádildik qaǵıdatyn ornatýdy, halyqaralyq qoǵamdastyqtyń barlyq múshesiniń zańdy jáne egemendik quqyǵyn eskere otyryp, ony demokratıalandyrýdy jaqtaıtynyn jetkizdi. Memleket basshysy BUU Qaýipsizdik Keńesindegi qazirgi toqyraý jaǵdaıynda ámbebap uıymnyń ókildik aıasy anaǵurlym keń organy sanalatyn BUU Bas Assambleıasynyń rólin kúsheıtýge múmkindik bar ári qajet dep esepteıdi. – Bul rette BUU Qaýipsizdik Keńesin reformalaý isinde asyǵystyq tanytýǵa bolmaıdy. Bizdiń oıymyzsha, bul mańyzdy organǵa álemniń barlyq aımaǵynyń elderi, sonyń ishinde jahandyq Ońtústik memleketteri múshe bolýǵa tıis. Shyn máninde, bul ustanymdy osy jıynǵa qatysyp otyrǵan memleketter basshylarynyń barlyǵy quptaıtyny qýantady, – dedi Prezıdent.