Búgin, 13 qazan jumada Jazýshylar odaǵynyń kitaphanasynda «Qobdanyń qońyr jeli» atty qos tomdyqtyń tusaýy kesilip, oqyrmandarǵa jol tartty, dep habarlaıdy almaty-aqshamy.kz.
Qos tomdyqta Mońǵolıadaǵy 100-den astam qazaq qalamgeriniń eńbekteri toptastyrylǵan.
«Qobdanyń qońyr jeli» almatylyq ádebı qaýymǵa búgin jetti. Buǵan deıin Mońǵolıadaǵy qazaq qandastary ortasynda jáne Astanada tusaýy kesilip, arnaıy is-sharalar ozdyrylǵan bolatyn. Almatydaǵy tusaýkeseri Jazýshylar odaǵy quramyndaǵy Shetel qazaq ádebıeti keńesiniń kezekti otyrysy aıasynda ótkizildi.
Jınaqta Mońǵolıa jerindegi qazaq qalamgerlerinen shyqqan 36 prozashy men 84 aqynnyń shyǵarmalaryn «proza» jáne «poezıa» syndy eki tomǵa jınaqtalǵan. Atalǵan eńbek qazaq poezıasynyń asa kórnekti ókili, aı mańdaı aqyn Suraǵan Rahmetulynyń jetekshiliginde qurastyrylǵan.
«Qobdanyń qońyr jeli» jınaǵynyń Almatydaǵy tusaýyn áıgili aqyn, dramatýrg Iran Ǵaıyp pen uzaq jyldan beri shetel qazaq ádebıeti men fólkloryn zerttep kele jatqan ǵalym Zufar Seıitjan kesti.
Aıta keteıik, «Qobdanyń qońyr jeli» jınaǵynyń shyǵýyna «Zeınolla Sánik» mádenıet qory qollaý kórsetken. Qor tóraǵasy Qanat Zeınolla buǵan deıinde Jazýshylar odaǵy men ózge de ortalyqtardyń ádebı hám mádenı is-sharalaryna, jekelegen avtorlardyń eńbekteriniń jaryq kórýine qoldaý kórsetip kele jatyr.
Tusaýkesermen qatar otyrysta ádebı keńes aldaǵy jyldaǵy shetel qazaq qalamgerleriniń shyǵarmalaryn atajurttaǵy oqyrmandarǵa tanystyrý boıynsha josparlaryn tanystyrdy. Keńes músheleri óz usynystarymen bólisti. Sondaı-aq, shetel qazaq qalamgerleri men olardyń birlestikteriniń jasap jatqan ıgi isterin de atap ótti.
Keńes tóraǵasy Armıabek Saǵyndyqulynyń aıtýynsha Ózbekstan qazaq jazýshylary memlekettik baǵdarlamamen túrki áleminiń 100 tomdyǵyn shyǵarǵan. Solardyń arasynda 10 tomdyǵy qazaq ádebıetiniń ókilderine arnalǵan. Al, Qytaıdaǵy qazaq qalamgerleri Qazaqstandaǵy ádebıet ókilderiniń 2 tomdyǵyn baspadan shyǵarǵan jáne ony qytaı tiline aýdaryp taratqan.
Jazýshylar odaǵy aldaǵy ýaqytta sheteldegi qalamgerlermen ádebı almasýdy tipti de damyta túsýdi josparlap otyrǵanyn aıtady.