Qasym-Jomart Toqaev Qazaqstanǵa resmı saparmen kelgen Katar memleketi Premer-Mınıstriniń orynbasary – Syrtqy ister mınıstri sheıh Muhammed ben Abdýlrahman ál-Tánıdi qabyldady.
Kezdesý barysynda qazaq-katar qatynastarynyń damý perspektıvalary talqylandy. Bul rette saıası, saýda-ekonomıkalyq jáne ınvestısıalyq baılanystardy nyǵaıtýǵa basa mán berildi, dep habarlady Almaty-akshamy. kz Akorda.kz saıtyna silteme jasap.
Qazaqstan Prezıdenti ózara qyzyǵýshylyq tanytatyn salalar boıynsha eki el arasyndaǵy qarym-qatynastardy nyǵaıtý úshin zor múmkindik bar ekenin aıtty.
– Sizdiń bul saparyńyzdyń mańyzy óte zor bolady dep oılaımyn. Keleshekte biz ózara yntymaqtastyq baǵytynda úlken nátıjelerge qol jetkize alatynymyzǵa senimdimin. Qazaqstan osyndaı jetistikterge qol jetkizýge múddeli, – dedi Memleket basshysy.
Prezıdent Qasym-Jomart Toqaev Katar Ámiri sheıh Tamım ben Hamad ál-Tanımen jýyrda telefon arqyly sóılesken kezde qol jetkizilgen ýaǵdalastyq týraly aıtty. Atap aıtqanda, taraptar Katar basshysynyń Qazaqstanǵa josparlanǵan saparynyń qarsańynda birneshe iri ınvestısıalyq jobalardy birlese ázirleý jóninde kelisimge kelgen.
Óz kezeginde Katar Premer-Mınıstriniń orynbasary – Syrtqy ister mınıstri Katar Ámiriniń Qazaqstan Prezıdentine jáne halqyna joldaǵan sálemi men izgi tilegin jetkizdi.
Sheıh Muhammed ben Abdýlrahman Ál Tanı Qasym-Jomart Toqaevqa Katar Ámiriniń ekonomıka salasyna basa mán bere otyryp, Qazaqstanmen aradaǵy yqpaldastyqty odan ári nyǵaıtý úshin berik negiz qalaýǵa múddeli ekenin bildirdi. Sondaı-aq koronavırýs indetine qarsy qazaqstandyq QazVac vaksınasynyń ázirlenýine baılanysty Katar basshysynyń quttyqtaýyn jetkizip, atalǵan másele boıynsha kez kelgen kómek kórsetýge daıyn ekenin atap ótti.
Budan bólek, Katardyń syrtqy saıası vedomstvosynyń basshysy Qazaqstan Prezıdenti Qasym-Jomart Toqaevqa Syrtqy ister mınıstri Muhtar Tileýberdimen ótkizgen kelissóz nátıjeleri jóninde, sondaı-aq, Qazaqstan tarapynan ınvestısıalyq jobalardy iske asyrýǵa baılanysty birqatar usynys túskeni týraly málimet berdi. Bul rette Katardyń Ulttyq ál-aýqat qory men ulttyq kompanıalary atalǵan jobalardy zertteý boıynsha belsendi jumys júrgizip otyrǵanyn atap ótti.