Qazaqstan Prezıdenti Irannyń jańadan saılanǵan Prezıdentin quttyqtady
Memleket basshysy Qasym-Jomart Toqaev Ibrahım Raısıdi Iran Islam Respýblıkasynyń Prezıdenti bolyp saılanýyna baılanysty Qazaqstan halqynyń jáne jeke óziniń atynan quttyqtady, dep habarlady Almaty-Akshamy.kz. Aqordanyń saıtyna silteme jasap.
– Saılaýdaǵy aıqyn jeńisińiz – Otanyńyzdyń damýyn baıandy, irgesin berik, mereıin ústem etýge baǵyttalǵan saıası baǵytyńyz ben baǵdarlamalaryńyzdy qoldaýdyń, sondaı-aq ırandyqtardyń bolashaqqa umtylysyn ózińizben baılanystyryp otyrǵanynyń jarqyn kórinisi. Osy tusta Iran Islam Respýblıkasy men onyń halqynyń ıgiligi men kemel keleshegin asyl maqsat tutqan bastamalaryńyz ben qolǵa alǵan isterińizge sáttilik serik bolýyna tilektestigimdi bildiremin, – delingen jedelhatta.
Memleket basshysy Irandy Kaspıı óńirindegi tatý kórshi jáne ıslam álemindegi Qazaqstannyń senimdi seriktesteriniń biri retinde sanaıtynyn aıtty.
Sonymen qatar Prezıdent eki el arasyndaǵy dástúrli dostyq pen ózara qoldaý rýhynda qalyptasqan yntymaqtastyqty saqtap qana qoımaı, oǵan tyń serpin, jańa mán beretinine senim bildirip, ekijaqty jáne kópjaqty formattardaǵy tyǵyz yqpaldastyqty odan ári nyǵaıtý úshin Iran Prezıdentimen birlese kúsh jumyldyrýǵa daıyn ekenin naqtylady.
Qasym-Jomart Toqaev Ibrahım Raısıdiń jaýapty qyzmetine tolaǵaı tabys, otbasyna baıandy baqyt, al dostas Iran halqyna yrys pen qut-bereke tiledi.