Kezdesýde buǵan deıin joǵary deńgeıde qol jetkizilgen ýaǵdalastyqtardy júzege asyrý máseleleri talqylandy.
Memleket basshysy BAÁ-niń Qazaqstandaǵy elshisi Muhammed Saıd Muhammed ál-Arıkıdi qabyldady, dep habarlaıdy Almaty-akshamy.kz Aqordaǵa silteme jasap.
Memleket basshysy saýda-ekonomıka salasy ekijaqty baılanystardyń basty baǵyty sanalatynyn aıtty. Bul rette eki eldiń úkimetterine taıaý keleshekte saýda-sattyq kólemin 1 mıllıard dollarǵa deıin jetkizý mindeti júktelgenin eske saldy.
Prezıdent Strategıalyq ınvestısıalyq jobalar týraly birlesken málimdemege sáıkes energetıka, aýyl sharýashylyǵy, kólik jáne logıstıka salalaryndaǵy qarym-qatynasty odan ári nyǵaıtýdyń mańyzdylyǵyna nazar aýdardy.
Qasym-Jomart Toqaev Ámirlikterdiń Masdar kompanıasymen jańartylatyn energıa kózderi salasyndaǵy birlesken jobalardy ilgeriletý boıynsha yntymaqtastyqtyń qarqyndy damyp kele jatqanyn, sondaı-aq AD Ports Group jáne Terminals Holding kompanıalarymen birlesip kólik-logıstıka jelisi men áýe tasymaly qyzmetterin keńeıtýdi kózdeıtin ınvestısıalyq jobalardyń júzege asyryla bastaǵanyn atap ótti.
Áńgimelesý barysynda aqparattyq tehnologıalardy damytý baǵytyndaǵy yqpaldastyq máselesine aıryqsha mán berildi.
Prezıdent Qazaqstan men Ámirlikter arasyndaǵy dostyq pen yntymaqtasty nyǵaıtýǵa zor eńbek sińirgeni úshin Muhammed Saıd Muhammed ál-Arıkıdi II dárejeli «Dostyq» ordenimen marapattady.