Qazaqstan men Ázirbaıjannyń parlamentaralyq dıalogy jandanyp keledi
Kezdesý barysynda Qasym-Jomart Toqaev Qazaqstan men Ázirbaıjan arasyndaǵy qatynastardyń erekshe sıpatqa ıe ekenin aıtty, dep habarlaıdy Almaty-akshamy.kz Aqordanyń resmı saıtyna silteme jasap.
«Sońǵy jyldary memleketaralyq yntymaqtastyǵymyz qarqyndy damyp keledi. Ázirbaıjan Prezıdenti Ilham Álıevpen árdaıym baılanystamyn. Biz elderimiz arasyndaǵy ózara qarym-qatynastardyń qazirgi jaǵdaıy men damý perspektıvalary týraly únemi pikir almasamyz. Táýelsizdik alǵan ýaqyttan beri elderimiz arasyndaǵy yntymaqtastyqty tabysty jalǵastyryp kelemiz», – dedi Prezıdent.
Memleket basshysy eki eldiń parlamentaralyq dıalogynyń jandanyp kele jatqanyn erekshe atap ótti.
«Keıingi jyldary parlamenttik dıplomatıa birte-birte saıası mańyzǵa ıe bolyp keledi. TúrkPA-nyń jýyrda ótken otyrysynyń qorytyndylary – munyń anyq dáleli. Atalǵan jıyn óte tabysty boldy jáne birlesken óte mazmundy qujat qabyldandy», – dedi Qasym-Jomart Toqaev.
Mıllı Májilis spıkeri kezdesýge múmkindik bergeni úshin Memleket basshysyna alǵys aıtyp, Prezıdent Ilham Álıevtiń júrekjardy sálemin jetkizdi. Sonymen qatar TúrkPA jumysynyń qorytyndylary týraly aıtty.
«Biz Assambleıanyń jumysyna atsalysqanymyzǵa óte qýanyshtymyz. Qazaq halqynyń rýhanı ortalyǵy – Túrkistanda bolǵan eki kún ishinde onda atqarylyp jatqan aýqymdy jumystarǵa kýá boldyq. Kórgenimizdiń bári bizdi qatty tamsandyrdy. Ázirbaıjan men Qazaqstan - baýyrlas memleketter. Bizdi túrkilik tamyrymyz, ortaq mádenıetimiz ben dástúrimizdiń uqsastyǵy sıaqty kóp dúnıeler biriktiredi. Sonymen qatar Ázirbaıjan men Qazaqstan – strategıalyq seriktester», – dedi Sagıba Gafarova.