1953 jyly 17 mamyrda dúnıege kelgen.
Budan buryn habarlaǵanymyzdaı, Memleket basshysy týǵan kúnin toılamaıdy, búgin Qytaı Halyq Respýblıkasynda memlekettik saparmen júr, dep habarlaıdy Almaty-akshamy.kz
Qasym-Jomart Kemeluly Toqaev 1953 jyly 17 mamyrda Almaty qalasynda týǵan. Ákesi – Kemel Toqaev (1923-1986) Uly Otan soǵysynyń ardageri, belgili jazýshy, qazaq ádebıetiniń detektıv janrynyń negizin qalaýshy. Sheshesi – Turar Shabarbaeva (1931-2000) Almaty shet tilderi pedagogıkalyq ınstıtýtynda qyzmet etken.
Bolashaq prezıdent №25 İlıas Esenberlın atyndaǵy mektep-gımnazıada bilim alǵan.
Q.K.Toqaev 1975 jyly Máskeý memlekettik halyqaralyq qatynastar ınstıtýt bitirgen. KSRO-nyń Qytaı Halyq Respýblıkasyndaǵy elshiliginde dıplom aldyndaǵy taǵylymdamadan ótken. 1983-1984 jyldar aralyǵynda Beıjiń lıngvısıka ınstıtýtynda taǵylymdamadan ótti. 1992 jyly Reseı Federasıasy Syrtqy ister mınıstrliginiń Dıplomatıalyq akademıasyn támamdady.
Eńbek jolyn 1975 jyly KSRO-nyń Syrtqy ister mınıstrliginde bastap, Keńes Odaǵynyń Sıngapýr Respýblıkasyndaǵy elshiligine jumysqa joldanǵan. 1979 jyly KSRO Syrtqy ister mınıstrliginiń apparatyna oralady. 1984-1985 jyldar aralyǵynda KSRO Syrtqy ister mınıstrliginde qyzmet atqaryp, keıinnen Keńes Odaǵynyń Qytaı Halyq Respýblıkasyndaǵy elshiligine jiberildi. Onda 1991 jylǵa deıin ekinshi hatshy, birinshi hatshy jáne keńesshi laýazymdarynda qyzmet isteıdi.
1992 jyly Qazaqstan Respýblıkasynyń Syrtqy ister mınıstriniń orynbasary bolyp taǵaıyndalady. 1993 jyly Qazaqstan Respýblıkasynyń Syrtqy ister mınıstriniń birinshi orynbasary boldy. 1994 jyly elimizdiń Syrtqy ister mınıstri bolyp taǵaıyndalady. 1999 jylǵy naýryzda Qazaqstan Respýblıkasy Premer-Mınıstriniń orynbasary boldy. 1999 jylǵy qazanda Parlamenttiń kelisimi boıynsha Qazaqstan Respýblıkasy Prezıdentiniń Jarlyǵymen Premer-Mınıstr bolyp taǵaıyndaldy. 2002 jylǵy qańtarda Qazaqstan Respýblıkasynyń Memlekettik hatshysy – Syrtqy ister mınıstri boldy. 2003-2007 jyldary – Qazaqstan Respýblıkasynyń Syrtqy ister mınıstri. Bul qyzmette jahandyq ıadrolyq qarý-jaraqty taratpaý úderisine belsendi atsalysty.
2007 jylǵy qańtarda Qazaqstan Respýblıkasy Parlament Senatynyń Tóraǵasy bolyp saılandy. 2008 jyly Qazaqstan Parlamentiniń joǵary palatasynyń spıkeri retinde EQYU Parlamenttik assambleıasynyń vıse-prezıdenti bolyp saılandy.
2011 jylǵy naýryzda BUU Bas hatshysynyń orynbasary, BUU-nyń Jenevadaǵy bólimshesiniń Bas dırektory, sondaı-aq Qarýsyzdaný jónindegi konferensıada BUU Bas hatshysynyń jeke ókili bolyp taǵaıyndaldy. Sonymen qatar Qarýsyzdaný jónindegi konferensıanyń Bas hatshysy laýazymyn atqardy. TMD-nyń jáne Shanhaı yntymaqtastyq uıymynyń Syrtqy ister mınıstrleri keńesiniń tóraǵasy bolyp saılandy.
2013 jylǵy 16 qazanda Qazaqstan Respýblıkasy Parlament Senatynyń Tóraǵasy bolyp qaıta saılandy.
2019 jylǵy 20 naýryzda Qazaqstan Respýblıkasynyń Prezıdenti retinde ant qabyldady.
2019 jyly 9 maýsymda ótken kezekten tys Prezıdent saılaýynda 70,96 paıyz daýys jınap, Qazaqstan Respýblıkasynyń Prezıdenti bolyp saılandy. 2019 jyly 12 maýsymda QR Konstıtýsıasynyń 42-babyna sáıkes ant berip, resmı túrde saılanǵan Prezıdent retinde Memleket basshysynyń laýazymyna kiristi.
Qasym-Jomart Toqaev 2022 jyldyń 20 qarashasynda ótken kezekten tys prezıdent saılaýynda 81,31% daýys jınap, jeńiske jetti. 2022 jyly 26 qarashada Qazaqstan Respýblıkasy Prezıdentin saltanatty ulyqtaý rásimi ótti.
2021 jyly sáýir aıynan bastap Qazaqstan halqy Assambleıasynyń Tóraǵasy. 2022 jyly qańtar aıynan bastap Qazaqstan Respýblıkasy Qaýipsizdik Keńesiniń Tóraǵasy. Tótenshe jáne Ókiletti Elshi. Saıası ǵylymdarynyń doktory. Dúnıejúzilik gýmanıtarlyq jáne jaratylystaný ǵylymdary akademıasynyń tolyq múshesi. Qaýipsizdik jónindegi Múnhen konferensıasy «Ǵulamalar keńesiniń» múshesi. Shenchjen ýnıversıtetiniń (QHR) jáne Reseı Federasıasynyń Syrtqy ister mınıstrligi Dıplomatıalyq akademıasynyń qurmetti profesory. Qazaqstannyń halyqaralyq qatynastar jónindegi keńesiniń qurmetti prezıdenti. Jeneva Dıplomatıa jáne halyqaralyq qatynastar mektebiniń qurmetti dekany. Reseı bıografıalyq qoǵamynyń tujyrymy boıynsha 2018 jyldyń «Jyl adamy» laýreattarynyń tizimine engen.
13 jyl boıy Qazaqstannyń ústel tenısi federasıasyn basqardy.
Halyqaralyq qatynastar máselelerine arnalǵan 10 kitaptyń avtory.
Qazaqstan Respýblıkasynyń jáne shet elderdiń kóptegen memlekettik nagradalarymen, sondaı-aq medaldarmen marapattalǵan.
Salaýatty ómir saltyn ustanady. Kórkem shyǵarmalardy, saıası jáne memýarlyq baǵyttaǵy ádebıetterdi oqyǵandy unatady.