Úsh el birlesip Roza Baǵlanova týraly tolyqmetrajdy fılm túsirilmek
Ózbekstanda ótken halyqaralyq kınofestıvalde elimiz usynǵan «Roza» atty fılm senarıi júldeger boldy, dep habarlaıdy Almaty-akshamy.kz QazAqparatqa silteme jasap.
Aldaǵy ýaqytta Qazaqstan, Ózbekstan, Fransıa elderi birlesip, ánshiniń ómiri men shyǵarmashylyǵyn baıandaıtyn fılm túsiretinin «Qazaqfılm» kınostýdıasynyń bas redaktory, kınodramatýrg, kınorejısser Bekbolat Shekerov aıtty.
Qyrkúıek aıynda Tashkentte ótken halyqaralyq kınofestıval aıasynda Ózbekstandaǵy Fransıanyń elshiligi úzdik senarıler arasynda «pıchıng» uıymdastyrdy.
Oǵan «Qazaqfılm» kınostýdıasy 4 joba usyndy. Olardyń arasynan qazaqtyń dara qyzy, ataqty ánshisi Roza Baǵlanova arnalǵan «Roza» atty senarı júldegerler qatarynan kórindi.
«Pıchıng barysynda eń úzdik senarıler anyqtaldy. Birinshi oryndy Tájikstan qanjyǵalasa, ekinshi oryndy Qazaqstan men Ózbekstan elderi ózara bólisti. Bizdiń «Roza» atty fılmge arnaıy jazylǵan senarıimiz joǵary baǵa aldy. Osyǵan oraı, Ózbekstandaǵy Fransıa elshiligi jobanyń ary qaraı fılm bolyp jaryqqa shyǵýyna kómektesetinin málimdedi. Tıisinshe, olar endi aldaǵy ýaqytta túsiriler fılmge barlyq derekterdi jınaqtap, olardy fransýz prodúserleri men ınvestorlarǵa usynatyn bolady. Sol sebepti, aldaǵy ýaqytta Qazaqstan, Ózbekstan jáne Fransıanyń birlesýimen áıgili ánshi Roza Tájibaıqyzy jaıly tolyqmetrajdy fılm jaryqqa shyǵady dep oılap otyrmyz», - dedi Bekbolat Shekerov.
Áıgili ánshi týraly fılm senarıi naqty faktiler men oqıǵalarǵa negizdelgen, ol ánshiniń taǵdyryn baıandaıtyn «baıopık» janryndaǵy fılm bolmaq.
«Kınokartına jelisi 1980 jyly 15 sáýirde Roza Tájibaıqyzynyń sol kezdegi Lenın saraıynda konsert berip turǵan kezinen bastalady. Iaǵnı, ol sahnada án aıtyp turǵan kezde, kózi qaraýytyp, aınalasyn kórmeı qalady. Keıin dáriger anyqtaǵandaı, 1943 jyly maıdanda jarylǵan snarádtyń ushqyny onyń basynda qalyp qoıǵan. Sol sebepti kózderi kórmeı qalǵan. Jalpy, Roza apamyz shyǵarmashylyq ómir jolyn Tashkent qalasynan bastaǵan. 1941 jyly osy jerden Tashkent fılarmonıasynyń quramynda maıdanǵa attanady. Qan maıdannan oralǵan soń, Keńes úkimeti kezinde Aral teńiziniń máselesin alǵashqylardyń biri bolyp kóterdi, 1986 jylǵy kóteriliste alańǵa júgirip shyǵyp, stýdentterdi soldattardyń uryp-soǵýynan qutqarýǵa tyrysqanyn aıttym. Jalpy, fılm jaıly materıal jınap, senarı jazýǵa, jobany daıyndaýǵa eki jyl ýaqyt ketti. Negizi Roza Tájibaıqyzy týraly búginge deıin kóptegen serıal, derekti fılmder shyqqan. Alaıda, ázirge onyń jeke ózine arnalǵan eshqandaı kórkem fılm jaryqqa shyqpaǵan», - dedi kınorejısser.