Qazaqstan 2025 jyldyń sáýir aıyna deıin Syrdarıa ózeni arqyly shamamen 11 mlrd tekshe metr sý alady.
Ortalyq Azıa elderiniń ókilderimen kelissózder júrgizgen Sý resýrstary jáne ırrıgasıa mınıstri Nurjan Nurjigitov osy jóninde kelisimge qol jetkizdi, dep habarlaıdy aqshamnews.kz sala mınıstrligine silteme jasap.
Mınıstr Memleketaralyq sý sharýashylyǵyn úılestirý komısıasynyń (MSSHÚK) 87-shi otyrysyna elimizdiń atynan qatysty. Otyrys Túrkimenstannyń Ashhabad qalasynda ótti. Kezdesýge Tájikstan, Túrkimenstan jáne Ózbekstannyń sý sharýashylyǵy vedomstvolarynyń basshylary qatysty. Al, Qyrǵyzstan eliniń ókilderi baqylaýshy retinde qatysty.
Nátıjesinde, 1 sáýirge deıin elimizdegi Shardara sý qoımasyna 11 mlrd tekshe metr sý keledi dep kútilýde. Bul 2025 jylǵy sýarý maýsymynda elimizdiń ońtústik aımaqtaryna qajet sý kólemin jınaqtaýǵa múmkindik beredi.
Aıta ketý kerek, otyrysqa qatysýshylar Syrdarıa jáne Amýdarıa ózenderi baseınderindegi sý qoımalarynyń boljamdy jumys kestesin bekitti, sonymen qatar 2024-2025 jyldardyń kúzgi-qysqy kezeńine Ortalyq Azıa elderine sý berý kólemin aıqyndady.
«Bıyl kelissózder men birlesken jumystyń nátıjesinde biz Syrdarıa ózeni baseıninde sýdy tıimdi bólýge qol jetkizdik. Sondaı-aq, 86-shy otyrys qorytyndysy boıynsha birlesip atqarylǵan jumysqa oń baǵamdy bergim keledi. Atap aıtqanda, Qyrǵyzstanmen sý-energetıkalyq yntymaqtastyq týraly kelisimder júzege asyryldy, sondaı-aq bıyl sýarý maýsymynda «Bahrı-Tochık» sý qoımasynyń jumys kestesin úılestirý boıynsha is-sharalar qabyldandy»,– dedi Sý resýrstary jáne ırrıgasıa mınıstri Nurjan Nurjigitov.
MSSHÚK kelesi, 88-shi otyrysy 2025 jyldyń birinshi toqsanynda Dýshanbe qalasynda ótedi.