Fınlándıa orman ónerkásibiniń el ekonomıkasynda súbeli orny bar, orman resýrstaryna eń baı el. Fınlándıa ormandardy sertıfıkattaǵan alǵashqy el. Aǵash kesý tehnıkasy, óndirisi, óńdeýi damyǵan jeke orman sharýashylyǵynyń kóshbasshysy.
QR Ekologıa jáne tabıǵı resýrstar mınıstri E. N.Nysanbaevtyń, fın delıgasıasynyń, sondaı-aq ǵylymı qoǵamdastyq, qazaqstandyq bıznes sektory jáne úkimettik emes uıymdar ókilderiniń qatysýymen «Ormandardy turaqty basqarý jónindegi Qazaqstan-fın forýmy» ótti, dep habarlaıdy Almaty-akshamy.kz.
Ekologıa jáne tabıǵı resýrstar mınıstrliginiń málimetine saı, Fınlándıa ormandary el aýmaǵynyń, shamamen, 76%-yn alyp jatyr jáne Fınlándıanyń orman ósirý jónindegi is-sharalardy jáne aǵash daıyndaýdyń damyǵan júıesin ótkizýdegi tájirıbesi bizdiń elimiz úshin paıdaly.
Bizdiń elimizdiń memlekettik orman qorynyń jalpy aýdany – 30,9 mln. ga quraıdy jáne respýblıka aýmaǵynyń 11,3%-yn alyp jatyr. Táýelsizdik jyldary orman qorynyń aýdany – 6,4 mln.gektarǵa (25%) ulǵaıdy.
«Bonn shaqyrýynyń maqsattaryna qol jetkizý úshin biz 2021 jyldan bastap ormandardy molyqtyrý jáne orman ósirý kólemin jyl saıyn 10 myń gektarǵa ulǵaıtýǵa mindettendik, nátıjesinde bul 1,5 mln. gektardy quraıdy», - dedi N.Q.Shárbıev.
Osy baǵytta Qazaqstan Respýblıkasy Prezıdentiniń bastamasy boıynsha respýblıka aýmaǵyndaǵy ormandardy ulǵaıtý maqsatynda 2021 jyldan 2025 jylǵa deıin memlekettik orman qoryna 2 mlrd. seppeler otyrǵyzylady.
«Qazaqstan men Fınlándıa arasynda ınvestısıalyq yntymaqtastyqty arttyrý jáne ózara saýdany ulǵaıtý boıynsha úlken múmkindikter bar. Biz barlyq baǵyttar boıynsha ózara tıimdi yntymaqtastyqty tereńdetýge jáne nyǵaıtýǵa nıettimiz», - dedi QR Ekologıa jáne tabıǵı resýrstar mınıstri E. N.Nysanbaev Fınlándıanyń halyqaralyq saýda jónindegi memlekettik hatshysynyń orynbasary Iarno Syrálamen ekijaqty kezdesý barysynda.
Mınıstr, sondaı-aq, bıyl eki el arasyndaǵy saýda-ekonomıkalyq yntymaqtastyq jónindegi úkimetaralyq komısıaǵa 30 jyl tolatynyn atap ótti.
Forým elderdiń aǵash óńdeý ónerkásibiniń daıyndyǵy men áleýeti týraly aqparat almasýǵa, sondaı-aq osy baǵyttaǵy halyqaralyq yntymaqtastyq múmkindigin talqylaýǵa arnalǵan alańǵa aınaldy.