Qazaqstan-Oman birlesken komısıasy qurylady. Bul týraly Syrtqy ister mınıstrliginiń resmı ókili Aıbek Smadıarov málim etti, dep habarlaıdy Almaty-akshamy.kz. QazAqparatqa silteme jasap.
«Premer-Mınıstrdiń orynbasary – Syrtqy ister mınıstri Muhtar Tileýberdiniń dıplomatıalyq qatynastar ornaǵannan keıingi 30 jylda alǵash ret Oman Sultandyǵy men Bahreın Koróldigine resmı sapary ótti. Muhtar Tileýberdi Oman Sultandyǵy Premer-Mınıstriniń Halyqaralyq qatynastar jáne yntymaqtastyq jónindegi orynbasary Asad bın Tarıkpen kezdesti. Kelissózder barysynda taraptar ekijaqty yntymaqtastyqtyń negizgi baǵyttary men halyqaralyq kún tártibiniń ózekti máselelerin talqylady. Kezdesý qorytyndysy boıynsha syrtqy saıası vedomstvolardyń basshylary birlesken komısıa qurý týraly úkimetaralyq kelisimge, sondaı-aq saıası konsýltasıalar týraly memorandýmǵa qol qoıdy. Taraptar Qazaqstan-Oman birlesken komısıasy aıasynda jan-jaqty yntymaqtastyqty odan ári tereńdetýge, atap aıtqanda saýda-ekonomıkalyq jáne ınvestısıalyq salalardaǵy ózara is-qımyldy jandandyrýǵa ýaǵdalasty», - dedi Aıbek Smadıarov vedomstvoda ótken brıfıń barysynda.
Sondaı-aq onyń atap ótýinshe, Úkimet basshysynyń orynbasary Omannyń Qarjy mınıstri Sultan ál Habsımen kelissózder júrgizdi. Onda Qazaqstanda ıslamdyq qarjylandyrýdy damytý taqyryby talqylandy. Qazaqstandyq tarap osy saladaǵy birlesken jobalardy iske asyrý úshin «Astana» Halyqaralyq qarjy ortalyǵynyń alańyn qarastyrýdy usyndy.
«2023 jylǵy 2 aqpanda Qazaqstannyń syrtqy saıası vedomstvosynyń basshysy Bahreın Koroli Hamad ben Isa Ál-Halıfanyń qabyldaýynda boldy, oǵan QR Prezıdenti Qasym-Jomart Toqaevtyń atynan jyly lebizderi men tilekterin jetkizdi. Muhtar Tileýberdi suhbattasyn Qazaqstannyń saıası jáne ekonomıkalyq jańǵyrýynyń jańa kezeńimen tanystyrdy. Óz kezeginde Koról Qazaqstannyń qazirgi damý qarqynyn joǵary baǵalap, Qazaqstan halqynyń ıgiligi úshin júrgizilip jatqan Prezıdent reformalaryna qoldaý bildirdi. Qazaqstan-Bahreın saıası ózara is-qımylynyń damý serpinin eskere otyryp, taraptar dıalogty joǵary deńgeıde jalǵastyrýdyń mańyzdylyǵyn atap ótti. Saýda-ekonomıkalyq baılanystardy keńeıtý maqsatynda kóliktik-logıstıkalyq máselelerdi sheshý úshin birlesken kúsh-jiger jumsaýǵa kelisti. Sondaı-aq, álemdegi halyqaralyq jaǵdaı, óńirlik jáne jahandyq qaýipsizdik máseleleri boıynsha pikir almasý boldy», - dedi resmı ókil.