Kórme aqpan aıynyń sońyna deıin jalǵasady
Memlekettik ortalyq mýzeıinde Qazaqstannyń kásibı sýretshileri Gúljamal Tagenova, Svetlana Soı jáne Gúlshat Madıbıevanyń «Kóktem áýeni» óner týyndylarynyń kórmesi ótip jatyr, dep habarlaıdy Almaty-akshamy.kz.
Sýrettiń qudireti... Dúnıeni kózben kórip, túısiný negizinde beıneleıtin ónerdiń bul salasy adamdy tańǵajaıyp álemniń tuńǵıyǵyna boılatatyny sózsiz.
Kókeıdegi oı-qıaldy qylqalam ushyna syıdyra alǵan sýretshiniń kóz maıyn taýysyp salǵan shyǵarmasyna qyzyqpaý múmkin emes.
Gúljamal Tagenova – belgili qazaqstandyq sýretshi, pedagogıkalyq tájirıbesi mol, belgili qazaqstandyq sýretshi, QR Sýretshiler Odaǵynyń múshesi. Onyń jumystary Qazaqstan mýzeılerinde jáne Germanıa, Italıa, AQSH, Gresıa, Túrkıa, Fransıa, Shveısarıa jáne t. b. jeke koleksıalary usynylǵan.
Gúlshat Madıbıeva 2021 jyldan bastap Japonıanyń Halyqaralyq Akvarel ınstıtýtynyń (Nıgata/Japonıa) tolyq qaýymdastyrylǵan múshesi, QR Sýretshiler Odaǵynyń múshesi. Shyǵarmashylyqpen aınalysady, halyqaralyq, respýblıkalyq kórmelerge, sımpozıýmdardarǵa jáne ǵylymı konferensıalarǵa qatysýshysy, shyǵarmashylyqtaǵy bilimi men daǵdylaryn jetildirýde.
Svetlana Soı – 2009 jyldan bastap Halyqaralyq kórmeler men plenerlerge belsendi qatysady, sheteldik keskindemedegi jetistikteri úshin Seýl (Ońtústik Koreıa) «Azıa kóshbasshysy-2022» nagradalaryna ıe, sondaı-aq QR Sýretshiler Odaǵynyń múshesi.
Sharany ashqan Ortalyq mýzeıdiń dırektory Rashıda Harıpova: «Sýretshi oıshyl bolýy kerek, tarıhty jaqsy bilýi kerek. Osy oraıda kórmedegi keremet úılesim tapqan týyndylar sheberlik tásilderimen tań qaldyrady. Úsh sýretshi kenepke óz dúnıetanymyn, ulttyq mádenıet pen tarıhtyń erekshelikterin qylqalam arqyly sezimmen jetkize bilgen» - dep atap ótti.
QR Sýretshiler odaǵy qoǵamdyq birlestiginiń basqarma tóraǵasy Ómirbek Jubanıazov, Qazaqstan Sýretshiler odaǵy Almaty oblysy fılıalynyń tóraǵasy Ermuhan Júnisqan, «Ular» zamanaýı óner galereıasynyń dırektory Iýrıı Markovıch kórme avtorlaryn quttyqtap, tól mádenıetimizge qosqan úlesi úshin rızashylyq bildirip, alǵys hattaryn tabystady.
Búgingi tańda Qazaqstannyń zamanaýı sýretshileri shyǵarmashylyq erkindikke ıe bola otyryp, ulttyq naqyshty, mıfologıany, ejelgi nanymdar men Shyǵys motıvterin kórsete otyryp, sabaqtastyq pen ózindik ereksheligin saqtap qaldy. Sýretshiler túrli-tústi qarama-qaıshylyqtarmen, qıaldy, tynyshtyqty jáne qorshaǵan álemmen úılesimdi birlikti jetkizetin erekshe ómirlik energıamen toltyrylǵan jarqyn, stıldendirilgen jáne erekshe keskindeme sýretterin usynady. Biz sýretterdegi názik, salmaqsyz sulýlardyń kókte qalyqtap, gúlderge batyp, keńistikti kóktemniń, jastyq pen qýanyshtyń sezimi men kútýimen toltyratynyn kóre alamyz.
«Keskindeme ónerine, mamandyǵyna sheksiz adal úsh sýretshi búgin naǵyz kóktem merekesin syılady. Árqaısynyń jeke avtorlyq stıli bar qylqalam sheberlerin ónerge, mamandyǵyna degen sheksiz súıispenshilik birikteredi», - dedi quttyqtaý sózinde Á.Qasteev atyndaǵy memlekettik óner mýzeıiniń ǵalym hatshysy, QR Sýretshiler odaǵynyń múshesi, ónertanýshy Ekaterına Reznıkova.