Qazaqstan zańynda zaıyrly memleket ekeni aıtylǵan
Qazaqstan azamattary erkin oılaıdy, bul elde sóz bostandyǵy bar. Bul týraly Rım Papasy Fransısk Qazaqstan bıliginiń ókilderi, azamattyq qoǵam jáne dıplomatıalyq korpýs ókilderimen kezdesýi kezinde aıtty, dep habarlaıdy Almaty-akshamy.kz Azattyq Ruhy-na silteme jasap.
«Qazaqstannyń azamattyq qoǵamyna qurmetimdi bildiremin. Qazaqstandaǵy úılesimdilikti qazaqtyń ulttyq aspaby dombyraǵa teńer edim. Osy jaqynda dombyra aspabynyń qazaq úshin mán-mańyzy týraly estip bildim. Orta ǵasyrda keıbir dombyrada oınalǵan shyǵarmalar bar eken. Bul týyndylar sol kezdegi qoǵamnyń, halyqtyń basynan ótkergen jaıttarymen, oqıǵamen baılanysty. Qazaqstan batyrlar men oıshyldar, sýretshilerdiń jeri. Bul jer mádenıetke toly. Qazaq halqy kóshpeli el bolǵan. Tarıhta basynan ótkergen qıyn-qystaý kezderdi batyldyqpen eńsere bilgen halyq», - dedi Rım Papasy.
Onyń aıtýynsha, Qazaqstanda Batys pen Shyǵystyń úılesimdili bar. Eldegi 150-den astam etnostyq toptyń, 80-nen astam tildiń árqaısy óz ereksheligin saqtap otyr.
«Qazaqstan zańynda zaıyrly memleket ekeni aıtylǵan. Qazaqstan ólim jazasyn tolyqtaı joıǵany úshin alǵysymdy aıtqym keledi. Bul elde azamattardyń oı jáne sóz erkindigi bar eken. Qoǵamnyń ár múshesi teń quqyly. Azamattyq qoǵam áleýmettik osal sanattyń qamyn oılaıdy», - dep baǵa berdi Rım Papasy.