Mobıldi qosymshany PlayMarket pen AppStore dúkenderinen tegin júkteýge bolady.
Qazaqstan Ulttyq Banki halyq arasynda moneta ónimderin keńinen nasıhattaý úshin 2022 jyly "Qazaqstan monetalary" mobıldi qosymshasyn qoldanysqa engizdi, dep habarlaıdy Almaty-akshamy.kz
"Mobıldi qosymsha sırkýlásıalyq, koleksıalyq jáne ınvestısıalyq monetalardyń elektrondyq katalogy túrinde ázirlendi. Onda QUB shyǵarǵan barlyq monetaǵa qatysty aqparat toptastyrylǵan. Qosymshada ár serıa boıynsha shyǵarylǵan monetalardyń qysqasha sıpattamasymen taqyryptyq bólimder qamtylyp otyr. Keıbir jekelegen monetalar týraly vıdeorolıkterge, monetalardyń 3D-keskinine, sondaı-aq tolyqtyrylǵan shynaıylyq elementterine silteme berilgen", – dep habarlady bas bank.
Mobıldi qosymshada arnaıy opsıa bar. Sonyń kómegimen paıdalanýshy óziniń elektrondyq bazasyn jasaı alady. Bul – qolda bar monetalardyń qaǵazdaǵy esebiniń tıimdi balamasy.
"Koleksıalyq monetalar burynǵysha QUB ınternet-dúkeni arqyly satylatynyn atap ótemiz. Mobıldi qosymsha Qazaqstannyń nýmızmatıka tarıhynan syr shertip, túrli dáýirler men kezeńderdegi sáýlet jáne mádenı eskertkishtermen, mańyzdy tarıhı oqıǵalarmen, qazaq halqynyń kórnekti qaıratkerlerimen, baı mádenıetimen jáne dástúrimen tanysýǵa múmkindik beredi. QUB koleksıalyq monetalardy shyǵara otyryp, Qazaqstandy, tumsa tabıǵattyń sulýlyǵyn, halqynyń dástúri men baı tarıhyn tanystyrady. Moneta óndirisiniń zamanaýı jetistikteri men mamandardyń kásibı sheberligin pash etedi", – dep habarlady bas bank.