Kópir 2024 jyldyń maýsym aıynda iske qosylady.
Jańa kópir eldiń shyǵys jáne soltústik óńirleri men kórshiles memleketpen aradaǵy taýar aınalymy, júk jáne jolaýshylar tasymaly kólemin arttyrady, dep habarlaıdy Almaty-akshamy.kz
Túrikmenstan Prezıdenti Serdar Berdimuhamedov mańyzdy kólik ınfraqurylymy nysanynyń – «Túrikmenbashy - Garabogaz - Qazaqstan shekarasy» avtomobıl joly boıyndaǵy Garabogaz Kól shyǵanaǵy arqyly ótetin kópirdiń irgetasyn qalaý rásimine qatysty.
«Zaman talaptaryn eskere otyryp, Garabogaz shyǵanaǵy arqyly ótetin avtomobıl kópiriniń qurylysyn bastaýdy qolǵa alǵan durys dep sanadyq. Osy jyldyń 16 maýsymynda qabyldanǵan qaýlyǵa sáıkes, jalpy uzyndyǵy 354 metr jáne eni 21 metr bolatyn avtomobıl kópiriniń jobalyq-smetalyq qujattamasyn daıyndaý jáne salý kózdelgen. Kópir Túrikmenbashydan Garabogaz kól shyǵanaǵy arqyly Qazaqstan shekarasyna deıin aparatyn tas joldyń boıynda salynady», dep atap ótti Serdar Berdimuhamedov.
Osylaısha, kópir Túrikmenstan, Reseı, Qazaqstan, Iran men Úndistannyń júk tasymaldaýshylaryna teńiz, temirjol jáne avtomobıl kóligin paıdalanyp, eń qysqa jolmen Soltústik jáne Shyǵys Eýropa elderine shyǵýǵa múmkindik bermek.
Avtomobıl kópiri men ony jetkizetin joldar 2024 jyldyń maýsym aıynda iske qosylady.
Jol tórt jolaqty bolady – Qazaqstan shekarasy baǵytynda ár jaqqa eki jolaqtan. Nysan eski kópirdiń ornyna salynady.
Sondaı-aq, munda eni eki metr bolatyn jaıaý júrginshilerge arnalǵan jasandy jaryqtandyrý jáne qorshaý bolady.
Buǵan deıin Qazaqstan Prezıdenti Qasym-Joomart Toqaev Qazaqstan «Túrkmenbashy – Garabogaz – Qazaqstan shekarasy» jańa avtomobıl jolynyń qurylysyn qoldaıtynyn málimdegen bolatyn.