Áskerı-tehnıkalyq salada áskerı yntymaqtastyq ornatý múmkindigin talqylady
Astanaǵa Halyqaralyq yntymaqtastyq departamentiniń dırektory brıgadalyq general Iýsef bın Abdýlrahman ál-Tassan bastaǵan Saýd Arabıasy Koróldigi Qorǵanys mınıstrliginiń delegasıasy keldi, dep habarlaıdy Almaty-akshamy.kz.
İs-sharaǵa Saýd Arabıasy Koróldiginiń Qazaqstan Respýblıkasyndaǵy Tótenshe jáne Ókiletti Elshisi Feısal Hanıf ál-Kahtanı qatysty.
Qorǵanys mınıstrliginde delegasıany Qarýly kúshter Bas shtaby bastyǵynyń orynbasary general-maıor Asan Júsipov qabyldady. Sondaı-aq keńeıtilgen quramda Qorǵanys mınıstrligi Halyqaralyq yntymaqtastyq departamentiniń bastyǵy polkovnık Oljas Qusaıynovpen kezdesý ótti.
Taraptar áskerı bilim men ǵylym, jaýyngerlik daıyndyq jáne áskerı-tehnıkalyq salada áskerı yntymaqtastyq ornatý múmkindigin talqylady. Kezdesýge qatysýshylar atap ótkendeı, qorǵanys vedomstvolary arasynda qarym-qatynas ornatýdyń alǵashqy qadamy tıisti quqyqtyq bazany qurý bolmaq.
Sheteldik qonaqtar Ulttyq qorǵanys ýnıversıteti men Qarýly kúshterdiń memlekettik áskerı-tarıhı murajaıynda boldy.