Jumys toptary kelisim aıasynda jumys isteıdi.
Túmen qalasynda Transshekaralyq sý obektilerin birlesip paıdalaný men qorǵaý jónindegi Qazaqstan-Reseı birlesken komısıasynyń 12-shi (30-shy) otyrysy ótip jatyr. Bul týraly QR Ekologıa, geologıa jáne tabıǵı resýrstar mınıstrliginen málim etti, dep habarlaıdy Almaty-akshamy.kz QazAqparatqa silteme jasap.
Qazaqstan men Reseıdi álemdegi eń uzyn shekaralardyń biri ǵana emes, Jaıyq, Ertis, Esil, Tobyl, Elek, Qıǵash, Qaraózen jáne Saryózen sıaqty transshekaralyq ózender de biriktirip jatyr.
Eki el arasyndaǵy sý qatynasy 2010 jylǵy 7 qyrkúıektegi «Transshekaralyq sý obektilerin birlesip paıdalaný jáne qorǵaý týraly» kelisimmen retteledi. Birlesken komısıa jáne atalǵan ózender boıynsha jumys toptary osy kelisim aıasynda jumys isteıdi.
Birlesken komısıaǵa qos tarap teń tóraǵalyq etedi. Qazaqstannan ókil – QR Ekologıa, geologıa jáne tabıǵı resýrstar vıse-mınıstri S.M. Muqataev, Reseıden – RF Sý resýrstary federaldy agenttigi tóraǵasynyń orynbasary V.A. Nıkanorov.
«Otyrys barysynda barlyq transshekaralyq ózender baseınderi boıynsha jumys toptary basshylarynyń esebi tyńdalady. Taraptar aǵymdaǵy jyldaǵy kóktemgi sý tasqyny, sý qoımalardy toltyrý jáne turǵyndar men ekonomıka salalaryn sýmen qamtamasyz etý sharttary, gıdrotehnıka qurylystaryn keshendi paıdalaný jáne eksplýatasıalaý, transshekaralyq sý obektileriniń sý resýrstarynyń lastanýy men sarqylýynyń aldyn alý týraly aqparattarmen almasatyn bolady.
Onymen bir mezgilde, Jaıyq ózeni baseıniniń problemalaryn sheshýge, iri transshekaralyq ózender baseınderinde zertteý júrgizý boıynsha Yntymaqtastyqty belsendirýdiń biryńǵaı jol kartasyn iske asyrýǵa nazar aýdarylmaq.
İs-sharaǵa eki eldiń mınıstrlikteriniń, sý sharýashylyǵy uıymdarynyń, gıdrometeorologıa qyzmetteriniń, jergilikti atqarýshy organdardyń jáne basqa da mekemelerdiń ókilderi qatysyp jatyr», - delingen habarlamada.
Eske salsaq, komısıa men jumys toptarynyń otyrystary jylyna bir ret ár memleket aýmaǵynda kezektesip ótkiziledi.