Arnaıy nusqaýlarǵa qol qoıyldy.
QR ASHM Veterınarlyq baqylaý jáne qadaǵalaý komıtetiniń tóraǵasy Asqar Jaqypbaevtyń veterınarlyq jáne fıtosanıtarlyq qadaǵalaý boıynsha federaldyq qyzmet basshysynyń orynbasary Konstantın Savenkovpen kezdesýiniń qorytyndysy boıynsha Máskeýde qus tumaýyna baılanysty engizilgen ýaqytsha shekteýlerdi ózara alyp tastaý týraly nusqaýlarǵa qol qoıyldy, dep habarlaıdy Almaty-akshamy.kz Eldala.kz silteme jasap.
"Rosselhoznadzordyń" 2022 jylǵy 14 sáýirdegi №FS-KS-7/10399 hatymen Qazaqstan Respýblıkasynyń tórt oblysynan (Soltústik Qazaqstan, Pavlodar, Aqmola jáne Aqtóbe oblystary) ýaqytsha shekteýler alynyp tastalǵany atap ótiledi.
"Bul shara otandyq qus ósirý kompanıalaryna óz ónimderin Reseı Federasıasyna eksporttaýǵa múmkindik beredi", - dep habarlady Veterınarlyq baqylaý komıteti.
Vedomstvonyń málimetinshe, 14 sáýirden bastap Qazaqstan Respýblıkasyna tiri qusty, ınkýbasıalyq jumyrtqany, mamyq pen qaýyrsyndy, qus etin jáne jylýmen óńdeýden ótpegen qus etiniń barlyq túrlerin (keminde 70°s, 30 mınýt ishinde), qus eti men jemshóp qospalaryn (hımıalyq jáne mıkrobıologıalyq sıntezdiń jemshóp qospalaryn qospaǵanda), sondaı-aq qusty ustaý, soıý jáne bólshekteý úshin buryn qoldanysta bolǵan jabdyqtardy Bashqurtstan Respýblıkasynan, Stavropol ólkesinen (Georgıevsk qalasy men Neftekýmsk, Georgıevka, Izobılnen jáne Grachevskıı aýdandaryn qospaǵanda), Saratov (Krasnopartızan, Dergachev jáne Fedorov aýdandaryn qospaǵanda), Rostov (Peschanokop, Zernograd jáne Chertkovskıı aýdandaryn qospaǵanda) jáne Reseı Federasıasynyń Chelábınsk oblystarynan ákelýge qus tumaýy boıynsha buryn engizilgen ýaqytsha shekteýler alynyp tastalady.
Esterińizge sala keteıik, QR jekelegen oblystarynda qus tumaýynyń órshýine baılanysty 2021 jyldyń kúzinde RF qazaqstandyq qus sharýashylyǵy ónimderin ákelýge tyıym saldy. Búgingi kúni QR ónerkásiptik qus sharýashylyǵynda epızootıalyq jaǵdaı turaqtandy jáne óndirýshiler ınfeksıany boldyrmaý boıynsha barlyq qajetti is-sharalardy júrgizdi.