Ekijaqty kelissózdiń qorytyndysy boıynsha Qasym-Jomart Toqaev pen Vladımır Pýtın buqaralyq aqparat quraldarynyń ókilderi úshin birlesken málimdeme jasady, dep habarlaıdy Almaty-akshamy.kz
Qazaqstan Prezıdenti óz sózinde Máskeýge saparmen kelýge shaqyrǵany úshin Vladımır Pýtınge rızashylyǵyn bildirdi.
– Kelissóz óte mazmundy jáne tıimdi boldy. Osy múmkindikti paıdalana otyryp, búgingi kelissózge kóńilim tolatynyn aıtqym keledi. Bıyl memleketterimiz úshin ataýly jyl bolmaq. Elderimizdiń arasyndaǵy dıplomatıalyq qatynastardyń 30 jyldyǵyn atap ótemiz. Osy ýaqyt ishinde dostyqqa, ortaq tarıhqa jáne halyqtarymyzdyń mentaldyq turǵydan jaqyndyǵyna súıene otyryp, memleketaralyq yntymaqtastyqtyń úlgisin qalyptastyrdyq. Tıimdi saıası dıalogtyń arqasynda barlyq baǵyt boıynsha zor jetistikterge qol jetkizdik. Bizdiń qurlyqtaǵy shekaramyz – álemdegi eń uzyn shekara. Bul búkil halyqaralyq qoǵamdastyqqa naǵyz tatý kórshiliktiń, senimdi odaqtastyq pen strategıalyq seriktestiktiń jarqyn úlgisin kórsetip otyr, – dedi Memleket basshysy.
Qasym-Jomart Toqaev óte mazmundy jáne jemisti kelissóz júrgizilgenin málimdedi. Eki el basshylary qazirgi qazaq-orys máselelerin ashyq ári ózara senim negizinde talqylady.
– Elderimiz arasyndaǵy jan-jaqty baılanystardyń joǵary deńgeıdegi tabysty damýyna kóńilimiz tolatynyn atap óttik. Ózara tıimdi yntymaqtastyqtyń zor áleýetin eskere otyryp, saıası, ekonomıkalyq, ınvestısıalyq jáne mádenı-gýmanıtarlyq qarym-qatynastardy tereńdetýge nıetti ekenimizdi naqtyladyq. Biz ózara saýda-sattyqtyń oń qarqynyn saqtaýǵa ýaǵdalastyq. Pandemıa sharalaryna qaramastan, joǵary nátıjege qol jetkizildi. Byltyr taýar aınalymy 21 mıllıard dollardan asty, – dedi Qazaqstan Prezıdenti.
Qasym-Jomart Toqaevtyń aıtýynsha, Reseı kompanıalary Qazaqstan ekonomıkasyndaǵy jetekshi ınvestorlardyń bestigine kiredi jáne olardyń salǵan qarjylarynyń jalpy kólemi 17 mıllıard dollardan asady. Elimizde sheteldik kapıtaldyń úlesi bar árbir úshinshi kásiporyn Reseı kompanıalarynyń qatysýymen qurylǵan. Olardyń ortaq ınvestısıalyq portfeli barlyq salany qamtydy.
– Biz óndiris kooperasıasyn keńeıtýdiń perspektıvalaryn egjeı-tegjeıli talqyladyq. Bul baǵytta elderimiz qazirdiń ózinde 13 iri jobany iske asyrdy. Búginde quny 2,5 mıllıard dollardan asatyn 8 joba júzege asyrylyp jatyr. Budan bólek ınvestısıalyq quny shamamen 1,5 mıllıard dollar bolatyn taǵy 11 joba ázirlenýde. Kelissóz kezinde qurmetti Vladımır Vladımırovıchke bul jobalardyń bári meniń jeke baqylaýymda ekenin aıttym. Olardyń bári jańa jumys oryndaryn ashýǵa, elderimizdiń ónerkásip jáne tehnologıalyq áleýetin nyǵaıtýǵa baǵyttalǵan. Óńiraralyq yntymaqtastyqtyń da paıdasy zor. Eki el arasyndaǵy saýda aınalymynyń shamamen 70 paıyzyn óńirlerimiz arasyndaǵy ózara tıimdi saýda-sattyqtyń úlesi quraıdy, – dedi Memleket basshysy.
Qasym-Jomart Toqaev Qazaqstan men Reseı arasyndaǵy tabysty seriktestiktiń jańa ınovasıalyq ósim núkteleri esebinen keńeıip otyrǵanyn atap ótti. Búgin sıfrlandyrý, ǵaryshty ıgerý sıaqty ózekti máseleler men atom energetıkasy salasynda mamandar daıarlaý boıynsha elderimizdiń ilgerileýine múmkindik beretin birqatar qujatqa qol qoıyldy.
– Qazaqstanda ınjenerlik-tehnıkalyq sala boıynsha joǵary bilikti mamandardyń qajettigin eskere otyryp, bilim berý salasyndaǵy yntymaqtastyqqa erekshe mán berildi. Kelissóz barysynda Vladımır Vladımırovıchke Qazaqstanda Reseıdiń jetekshi joǵary oqý oryndarynyń fılıaldaryn ashýǵa keliskeni úshin rızashylyǵymdy bildirdim. Bul qadam elimizdiń bilim berý salasyn damytýǵa súbeli úles qosady dep oılaımyn, – dedi Qazaqstan Prezıdenti.
Qasym-Jomart Toqaev eki taraptyń da halyqaralyq bastamalardy ilgeriletýge ózara qoldaý kórsetetinin málimdedi. Memleket basshysynyń aıtýynsha, Qazaqstan halyqaralyq EKSPO kórmesin 2030 jyly Máskeýde ótkizý bastamasyn qoldaıdy.
Qazaqstan Prezıdenti Reseı Federasıasynyń aımaqtaǵy turaqtylyq pen qaýipsizdikti qamatamasyz etý isindegi rólin joǵary baǵalady. Qasym-Jomart Toqaev Eýrazıa keńistigindegi qaýipsizdiktiń tutastyǵyna qatysty Reseıdiń ustanymyn qoldady. Atalǵan qujat 2010 jyly EQYU-nyń Astana forýmynda qol qoıylǵan Deklarasıada bekitilgenin eske saldy.
– Qazirgi álemde basqa memleketterdiń qaýipsizdigine zalal keltire otyryp, óz qaýipsizdigin qamtamasyz etý múmkin emes jáne tıimsiz ekenimen kelisemiz. Sondyqtan halyqaralyq aýqymdaǵy qaýipsizdikke qatysty Reseı Federasıasynyń usynystary tabysty dıplomatıalyq kelissóz ótkizýge jaqsy negiz bolady. Kelissózderdiń tek sóz úshin emes, nátıjege qol jetkizý úshin júrgizilgenin qalaımyz. Túptep kelgende, «jaqsy janjaldan, jaman bolsa da bitim artyq», – dedi Qasym-Jomart Toqaev.
Prezıdent sózin qorytyndylaı kele, ótkizilgen kelissózge kóńili tolatynyn atap ótip, qonaqjaılyq kórsetkeni úshin Reseı tarapyna rızashylyǵyn bildirdi.