Qazaqstandyqtar VIP nómirlerge 6 mıllıard teńge jumsaǵan
Qazaqstandyqtar VIP nómirlerge 6 mıllıard teńge jumsap, 2021 jyly 20 myńnan astam qazaqstandyq ádemi nómirlerge ıe bolǵan, dep habarlaıdy Almaty-akshamy.kz «Azamattarǵa arnalǵan úkimet» memlekettik korporasıasynyń baspasóz qyzmetine silteme jasap.
Ótken jyly qazaqstandyqtar jalpy somasy 5,8 mlrd teńgege joǵary suranysqa ıe nemese VIP dep atalatyn nómirlerdi satyp alǵan. Avtokólik ıeleri 2020 jylmen salystyrǵanda ádemi nómirlerdi kóbirek rásimdeı bastaǵan, ol kezde 3,9 mlrd teńgege 12 616 nómir alynǵan bolatyn, – delingen «Azamattarǵa arnalǵan úkimet» memlekettik korporasıasynyń baspasóz qyzmeti taratqan aqparatta.
2021 jyly VIP nómirlerge eń kóp qarajatty almatylyqtar jumsaǵan: 2,2 mlrd teńgege 6882 nómir alynǵan. Ekinshi orynda shymkenttik avtokólik ıeleri 818 mln teńgege 3190 nómir satyp alsa, 667 mln teńgege 2231 nómir alǵan nursultandyqtar úshtikti túıindegen.
VIP nómirlerge Soltústik Qazaqstan oblysynda suranys az. Ótken jyly onda 45 mln teńgege barlyǵy 169 erekshe nómir tizbegi satyp alynǵan.
Sandar men áripterdiń kombınasıasyna baılanysty VIP-nómirlerdiń baǵasy 174 591 teńgeden bastalady, eń qymbaty 872 955 teńge turady, – delingen «Azamattarǵa arnalǵan úkimet» memlekettik korporasıasynyń baspasóz qyzmeti habarlamasynda.
Memlekettik korporasıa ókili nómir ıesi erekshe nómirler tizbegin úshinshi tarapqa syılaı da, sata da almaıtynyn aıtty.
Eger kólik satylsa, nómir ıesi ony jańa kólik satyp alǵanǵa deıin mamandandyrylǵan HQO-da 6 aı saqtaı alady, – deıdi «Azamattarǵa arnalǵan úkimet» memlekettik korporasıasynyń baspasóz qyzmeti.