Eki el ǵalymdary matematıka jáne ómir týraly ǵylymdar salasyndaǵy zertteýlerge basa nazar aýdarmaq
Qazaqstan jáne Qytaı ǵalymdary ǵylymdy jastar arasynda nasıhattaýdy birlesken zertteý jobalary negizinde júrgizbek. Odan bólek qazaqstandyq ǵalymdar úshin Qytaı bilim jáne ǵylym ordalarynda bilim alý múmkindigi keńeıedi, dep habarlaıdy Almaty-akshamy.kz.
Bul týraly Qazaqstannyń Ulttyq ǵylym akademıasyna arnaıy issaparmen kelgen Qytaı Ulttyq ǵylym akademıasynyń delegasıasymen kezdesý barysynda málim boldy.
QR Ulttyq ǵylym akademıasynyń Prezıdenti Kúnsulý Zakará eki eldiń joǵary oqý oryndary men ǵylymı akademıalarynyń arasyndaǵy yntymaqtastyqty nyǵaıtý mańyzyn atap ótti.
"Biz ǵalymdardyń halyqaralyq qatynasty ǵylym arqyly damytýdaǵy umtylysyn erekshe qoldaımyz. QR Ulttyq ǵylym akademıasy Qytaı ǵylym akademıasymen birlesip zertteý jobalaryn qolǵa alýǵa jáne oǵan jas ǵalymdardy tartýǵa daıyn", - dedi K. Zakará.
Óz kezeginde Qytaı UǴA vıse-prezıdenti Jang Tao qazaqstandyq áriptesterin Aspan asty eli akademıasynyń múshesi atanýǵa shaqyrdy. Sonymen qatar Jang myrza QR UǴA delegasıasyn Qytaıda asyǵa kútetinin jáne Qazaqstan ǵalymdaryn qytaı ǵylymynyń jetistikterimen tanystyrýǵa nıetti ekenin jetkizdi.
Eki el ǵalymdary matematıka jáne ómir týraly ǵylymdar salasyndaǵy zertteýlerge basa nazar aýdaratyndyǵyna toqtaldy.