Qazaqstan fýtbol federasıasy men Ózbekstan fýtbol qaýymdastyǵy joldastyq oıyn ótkizý týraly kelisimge keldi.
Mach 2022 jyldyń 16 qarashasy kúni Tashkent qalasyndaǵy «Pahtakor» stadıonynda ótedi, dep habarlaıdy Almaty-akshamy.kz.
«Ózbekstan quramasy Eýro-2024 irikteý kezeńine daıyndyq úshin jaqsy qarsylas dep sanaımyn. Jattyqtyrýshylar shtaby úshin kóp málimet jınaýǵa múmkindik beredi. Ózbekstanda sapaly fýtbolshylar kóp. Sol sebepti, osy oıynda Eýropa chempıonatynyń aldaǵy irikteý kezeńinde úmit artatyn fýtbolshylardy bir tekserip alamyn dep oılaımyn. Óte qyzyqty oıyn bolady dep úmittenemin», - dep pikir bildirdi Qazaqstan ulttyq quramasynyń bas bapkeri Magomed Adıev.
Buǵan deıin eki eldiń quramalary alty ret kezdesip, Ózbekstan eki ret, Qazaqstan bir ret jeńiske jetken bolatyn. Úsh oıyn teń aıaqtaldy.
FIFA reıtıńinde Ózbekstan quramasy 77-orynda tur.