Qazaqstannan parashúttik daıarlyq ortalyǵynyń mamandarynan barlyǵy 60 áskerı qyzmetshi jumyldyryldy
Tashkent oblysyndaǵy «Angren» taýly polıgonynda ótken jattyǵýdyń belsendi kezeńin Qorǵanys mınıstri general-polkovnık Rýslan Jaqsylyqov baqylady, dep habarlaıdy Almaty-akshamy.kz.
«Qalqan-2023» taktıkalyq-arnaıy oqý-jattyǵýyna birlesken jedel shtab basshylyq etti.
Oqý-jattyǵýdyń jospary boıynsha memleketterdiń biriniń aýmaǵynda qonystanǵan zańsyz qarýly qurylymdar ózderiniń yqpal etetin aımaqtaryn keńeıtýge tyrysady.
Esirtkimen zańsyz aınalysatyn toptardyń qarýly qaqtyǵysy shıelenistiń odan ári órshýine ákeledi. Esirtki trafıginiń baǵyttaryn qamtamasyz etý maqsatynda kórshiles eldiń bıik taýly aımaqtarynda tirek bazalaryn, qarý-jaraq pen oq-dáriler salynǵan jasyryn jerlerdi qurý áreketteri baıqalady. Destrýktıvti kúshter Angren baǵytynda erekshe belsendilik tanytady. Shekara narádtaryna oq jaýdyrady.
Qarqyndylyǵy tómen qaqtyǵys degen sıpattaǵy ahýalda Qazaqstan men Ózbekstannyń arnaıy maqsattaǵy birikken jasaǵy áskerı okrýgtiń jalpy áskerı bólimshelerimen ózara is-qımyl jasaı otyryp, shekara mańyndaǵy aýdandardaǵy zańsyz qarýly quralymdardy anyqtaý jáne olardy joıý jóninde arnaıy operasıa júrgizdi.
Taktıkalyq-arnaıy oqý-jattyǵý barysynda memlekettik shekarany qorǵaýdy nyǵaıtý júzege asyryldy, shekara beldeýindegi qarsylastyń shaǵyn toptaryn joıý boıynsha qos mergenniń is-qımyly pysyqtaldy. Al negizgi bólimshelerdi qoldaný aımaqtaryna jyljytýdy barlaý qyzmeti qamtamasyz etti.
Jaýdyń negizgi kúshterin joıýǵa baǵyttalǵan batalóndyq taktıkalyq toptardy qoldaý úshin áýe jáne artılerıalyq soqqylar jasaldy. Bul rette rezervtegi kúshter men quraldaryn urysqa qoldaný da synaldy. Operasıa sońynda batalóndyq taktıkalyq toptardyń bólimsheleri men tosqaýyldaǵy jasaqty qorǵanys aımaǵynan shyǵarý júzege asyryldy.
Qazaqstan tarapynan oqý-jattyǵýǵa armıa jáne áskerı-kóliktik avıasıa bólimshelerinen, Parashúttik daıarlyq ortalyǵynyń mamandarynan barlyǵy 60 áskerı qyzmetshi jumyldyryldy.
«Qalqan-2023» birlesken taktıkalyq-arnaıy oqý-jattyǵýy birlesken operasıaǵa daıyndalý jáne ony ótkizý kezinde basqarý organdary jumysynyń biryńǵaı algorıtmin ázirleýge, Qazaqstan men Ózbekstan qarýly kúshteri bólimsheleriniń birlesken qarym-qatynasy barysynda ózara is-qımyl máselelerin pysyqtaýǵa baǵyttalǵan.
General-polkovnık Rýslan Jaqsylyqov oqý-jattyǵý sońynda general-leıtenant Bahodır Qurbanovpen birge Ózbekstan Qarýly kúshteriniń akademıasyna bardy. Joǵary oqý ornynyń qyzmetimen tanysý barysynda ol Qazaqstan Qarýly kúshteriniń taqyryptyq synybynyń ashylý saltanatyna qatysyp, akademıanyń qurmetti qonaqtary kitabyna qoltańbasyn qaldyrdy.