Ózekti máselelerdi talqylady.
Prezıdent Qasym-Jomart Toqaevty halyqaralyq kongres ortalyǵynda resmı qarsy alý rásimi ótti, dep habarlaıdy Almaty-akshamy.kz Aqordanyń baspasóz qyzmetine silteme jasap.
Qurmet qaraýylynyń bastyǵy eki el basshylaryna raport berip, Qazaqstan men Ózbekstannyń ánurandary oryndalǵannan keıin Qasym-Jomart Toqaev pen Shavkat Mırzıóev bir-birine resmı delegasıalardyń quramyn tanystyrdy.
Budan soń memleketter basshylary shaǵyn quramda kelissóz júrgizdi. Qazaqstan Prezıdenti qonaqjaılyq kórsetip qarsy alǵan Shavkat Mırzıóevke rızashylyǵyn bildirip, memlekettik sapardyń mańyzdylyǵyn atap ótti.
«Biz Ózbekstanmen yntymaqtastyqty odan ári nyǵaıtýǵa múddelimiz. Qazaq pen ózbek – ejelden dostyǵy myzǵymas, syılastyǵy jarasqan baýyrlas halyqtar. Eki eldiń salt-dástúri, mádenıeti, tili, dini uqsas. Tarıhy tamyrlas, taǵdyrlas elderimizdiń maqsat-muraty da ortaq. Sondyqtan men búgingi saparǵa aıryqsha mán beremin. Biz tatý kórshilikke jáne senimdi seriktestikke negizdelgen qarym-qatynasty jańa deńgeıge kóteremiz dep senemin. Qazaqstan men Ózbekstan arasyndaǵy yntymaqtastyq neǵurlym tyǵyz jáne tabysty bolsa, Ortalyq Azıadaǵy ahýal soǵurlym turaqty bolady», – dedi Qasym-Jomart Toqaev.
Sonymen qatar Memleket basshysy Ózbekstan Prezıdentiniń Joldaýymen tanysqanyn jáne bul mańyzdy qujat Ózbekstannyń odan ári tabysty damýyna jol ashatynyn jetkizdi.
Shavkat Mırzıóev óz kezeginde Qazaqstan Prezıdentin saılaýdaǵy jeńisimen quttyqtap, Ózbekstanǵa memlekettik saparmen kelý týraly shaqyrýyn qabyl alǵany úshin rızashylyǵyn bildirdi. Ózbekstan Prezıdentiniń aıtýynsha, Qasym-Jomart Toqaevtyń bul sapary eki el qarym-qatynastarynyń damýyna tyń serpin berip, qol qoıylatyn qujattar naqty is-áreketterge berik negiz bolady.
Prezıdentter saıası, saýda-ekonomıkalyq jáne mádenı-gýmanıtarlyq salalardy keńeıtýge kóńil bólip, qazaq-ózbek strategıalyq seriktestiginiń aýqymdy máselelerin talqylady. Atap aıtqanda, eki el – Ortalyq Azıadaǵy eń iri saýda seriktester. Bıyl saýda aınalymy 35 paıyzǵa ósip, 5 mıllıard dollarǵa jýyqtady. Mundaı kórsetkishke ónerkásip, mashına jasaý, logıstıka, kólik, energetıka jáne basqa da salalarda birlesken jobalardy júzege asyrý arqyly qol jetkizilgenine nazar aýdaryldy.
Sondaı-aq taraptar jahandyq jáne aımaqtyq kún tártibindegi ózekti máselelerdi talqylady.
