Májilis Qazaqstan men Ózbekstan úkimetteri arasyndaǵy «Ortalyq Azıa» halyqaralyq ónerkásiptik kooperasıa ortalyǵynyń qyzmetin retteý týraly kelisimdi ratıfıkasıalady.
Qujatqa 2023 jyly 9 qarashada Tashkentte qol qoıylǵan. Ortalyq ónerkásiptik kooperasıa, ekonomıkalyq jáne ınvestısıalyq yntymaqtastyq kesheni retinde jumys isteıtin bolady, dep habarlaıdy aqshamnews.kz Parlament Májilisine silteme jasap.
Onyń mindetteri – memleketaralyq kooperatıvtik qatynastardy damytýǵa qolaıly jaǵdaı jasaý, taraptardyń shaǵyn jáne orta ónerkásiptik kásiporyndaryn halyqaralyq qun tizbegine biriktirý, ortalyq aýmaǵynda qurylǵan ónerkásiptik kásiporyndardyń básekege qabilettiligin arttyrý jáne basqalar. Halyqaralyq ónerkásiptik yntymaqtastyq ortalyǵy árqaısysy 500 sharshy metr aýmaqty alatyn, óz memleketiniń quzyrynda bolatyn qazaqstandyq jáne ózbekstandyq bólikterden turatyn bolady.
Qazaqstandyq bóligin basqarý Qazaqstan Respýblıkasynyń Saýda jáne ıntegrasıa mınıstrligine, al ózbek bóligi Ózbekstan Respýblıkasynyń Investısıalar, ındýstrıa jáne saýda mınıstrligine júkteldi. Nysannyń ornalasqan jeri «Atameken» (Qazaqstan) jáne «Gúlistan» (Ózbekstan) baqylaý-ótkizý beketteri mańyndaǵy elderdiń shekaralas aımaqtary bolyp anyqtaldy. Olar ortalyqtyń bir bóliginen ekinshi bóligine ótetin adamdardy, kólik quraldaryn, júkterdi, taýarlar men janýarlardy shekaralyq, kedendik jáne basqa da baqylaý túrlerin júrgizý úshin paıdalanylady.
Ortalyq aýmaǵynda sharýashylyq sýbektileri óndiristik kooperasıany damytýǵa baǵyttalǵan is-sharalardy júzege asyra alady. Kelisimdi ratıfıkasıalaý elderdiń óndiris pen kásipkerlikti damytý salasyndaǵy yntymaqtastyǵyn keńeıtýge, ınvestısıa tartýǵa jáne saýda-ekonomıkalyq qatynastardy jaqsartýǵa yqpal etedi.