Qorqyt ata atyndaǵy Qyzylorda ýnıversıteti Tashkent ırrıgasıa ınstıtýtymen birlesip sý mamandaryn daıarlaıdy.
Oqý oryndary arasynda tıisti kelisim jasaldy. Endi profesorlyq quram ózara tájirıbe almasyp, stýdentterge qos dıplom baǵdarlamasy boıynsha bilim beredi, dep habarlaıdy Almaty-akshamy.kz «Habar 24»-ke silteme jasap.
Tashkenttegi ırrıgasıa ınstıtýtynyń tarıhy tereńde. Bilim ordasynda sý mamandarynyń birneshe býyny qalyptasqan. Buryn bizdiń elde ınstıtýt fılıaly jumys istedi. Qazir sol baıyrǵy úrdis qaıta jandanýy múmkin. Qyzylordalyq profesorlar ózbekstandyq áriptesterimen jańa jobany qolǵa almaq.
«Negizgi maqsatymyz – qos dıplom baǵdarlamasyn engizý. Bul – ǵylymı zertteý ınstıtýty. Sondyqtan bizdiń ýnıversıtetke Qyzylordaǵa osy jaqsy tájirıbelerdi ákelip, sosyn bizdiń ǵalymdarmen birlesip jumys jasaý. Budan basqa, biz Tashkent ekonomıkalyq ýnıversıtetimen kezdespekpiz. Ol jaqta da tájirıbe almasyp, kelisimshartqa otyramyz», - deıdi Qorqyt ata atyndaǵy Qyzylorda ýnıversıtetiniń prorektory Maınur Bóribaeva.
Jalpy, baýyrlas qazaq pen ózbek úshin sý sharýashylyǵy – kúrmeýi qıyn kúrdeli sala. Tirshilik nárinen eki el de tarshylyq kóredi. Sondyqtan gıdrolog mamandarǵa suranys arta tústi. Al Tashkent ırrıgasıa ınstıtýtynyń osy salada tájirıbesi mol. Stýdentter oqý ornynyń bazasynda sýdy únemdeýdi, saqtaý men tıimdi paıdalaný joldaryn úırenip shyǵady.
«Aral baseınindegi ózender úshin eń ózekti máselelerdi zerttep jatyrmyz. Bul jerde sý arnalaryn shógindi, qatty mıneraldy zattardan tazartý mindeti tur. Ámýdarıada onyń mólsheri óte kóp. Syrdarıada sál kem. Ózen arnalaryn tazartý jolyn usynyp otyrmyz. Arnaıy qondyrǵy jasap shyǵardyq. Ony sý toraptaryna ornatyp, resýrstardy tıimdi paıdalanýǵa bolady», - deıdi Tashkent ırrıgasıa ınjenerleri ınstıtýtynyń kafedra meńgerýshisi Aıbek Arıfjanov.
Jobanyń maqsaty – qos dıplom baǵdarlamasyn engizý ǵana emes, birlesip ǵylymı zertteýler júrgizý. Ózbekstandyq ǵalymdar da osyǵan yntaly. Mundaı áriptestik aýyl sharýashylyǵy salasyna qajetti jańa mamandar shoǵyryn qalyptastyrýǵa sep. Qorqyt ata ýnıversıteti syrttaǵy qandastardy da nazardan tys qaldyrǵan emes. Tarıhı Otanynda bilim alam deýshilerdi oqytýǵa daıar.