Qazaqstan men Ózbekstan bilim berý salasyndaǵy yntymaqtastyq sheńberinde jańa kelisimge qol qoıady
Bul týraly QR Bilim jáne ǵylym mınıstri Asqat Aımaǵambetov pen Ózbekstan Respýblıkasynyń Halyqqa bilim berý mınıstri Bahtıer Saıdovtyń Nur-Sultan qalasyndaǵy kezdesýi barysynda málim boldy, dep habarlaıdy Almaty-akshamy.kz
Ózbekstannan kelgen delegasıanyń basty maqsaty – qazaqstandyq bilim berý júıesine engizilip jatqan jańashyldyqtarmen tanysý.
Ózbek tarapy buǵan deıin eki el arasyndaǵy ózara is-qımyl týraly kelisimge 1994 jyly qol qoıylǵanyn atap ótti. Áńgime barysynda mınıstr jańartylǵan qujat eki respýblıka arasyndaǵy bilim berý salasyndaǵy yntymaqtastyqty nyǵaıtýǵa jáne jańa deńgeıge shyǵarýǵa yqpaldasatynyn atap ótti.
Aıta keteıik, Qazaqstanǵa kelgen Ózbekstan Respýblıkasynyń Halyqqa bilim berý mınıstri eń aldymen elordalyq mektepterdi aralady.
«Meniń oıymsha, kelisim jobasyn daıyndaý kezinde eki el arasyndaǵy bilim berý salasyndaǵy yntymaqtastyqtyń basym baǵyttarynyń barlyq spektri qamtylǵany jón. Bul — muǵalimderdi daıarlaý, biliktilikti arttyrý, tájirıbe almasý máseleleri. Biz muǵalimderimizdiń Qazaqstanǵa saparyn uıymdastyryp, qazaqstandyq muǵalimderdi Ózbekstanǵa shaqyra alar edik. Bul tájirıbe men pikir almasý barysynda paıdaly bolady dep oılaımyn. Men birqatar qazaqstandyq muǵalimmen sóılestim. Olardyń árqaısysy jumystaryn zor qulshynyspen atqaryp, óz eliniń bolashaǵy úshin alańdaıtynyn baıqadym. Muǵalimder bilimdi qalaı bergen jón, oqýshyny tulǵa retinde qalyptastyrýdyń mańyzdylyǵy týraly oılanady eken», - dedi Ózbekstan Respýblıkasynyń Halyqqa bilim berý mınıstri Bahtıer Saıdov.
Astanalyq mektepterdi aralaý barysynda Bahtıer Saıdovqa oqý prosesine ıntegrasıalanǵan bilim berý baǵdarlamalary men sıfrlyq jobalar tanystyryldy. Sondaı-aq B. Saıdov qazaqstandyq mektepterdegi memlekettik-jekemenshik áriptestik jáne jan basyna qarjylandyrý júıesimen tanysty. B. Saıdov Ózbekstanda mektepterdegi bilim berý salasyn jetildirý úshin jeke mektepter arasyndaǵy básekelestikti kúsheıtýge múmkindik beretin qazaqstandyq memlekettik-jekemenshik áriptestik (MJÁ) júıesi de, sonymen birge jan basyna shaqqandaǵy qarjylandyrýǵa kóshý de zerdelenetinin atap ótti.