Bul ereje tótenshe jaǵdaıdy joıý kezinde kómek kórsetýge múmkindik beredi.
Senattyń jalpy otyrysynda «Qazaqstan Úkimeti men Ózbekstan Úkimeti arasyndaǵy tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi ratıfıkasıalaý týraly» zań qabyldandy, dep habarlaıdy Almaty-akshamy.kz QazAqparatqa silteme jasap.
Atalǵan kelisimge 2021 jyly 6 jeltoqsanda elordada qol qoıyldy.
QR Tótenshe jaǵdaılar mınıstri Iýrıı Ilınniń aıtýynsha, bul qujat tótenshe jaǵdaıdyń aldyn alý salasynda Qazaqstan men Ózbekstan úkimetteriniń quzyretti organdary yntymaqtastyǵynyń quqyqtyq negizdi belgileýge baǵyttalǵan. Taraptardyń bireýiniń aýmaǵynda tótenshe jaǵdaı bolǵan kezde, birlesken is-qımyldardyń arqasynda osy kelisim erejesi iske asyrylmaq.
Atalǵan kelisim tájirıbe almasýǵa, qaýip bolǵan jaǵdaıda turǵyndardy daıyndaýǵa, eki memlekettiń oqý oryndarynda azamattyq qorǵaý salasynda mamandardy oqytýǵa, bir eldiń aýmaǵynda bolǵan tótenshe jaǵdaıdy joıý kezinde kómek kórsetýge múmkindik beredi.
«Zań jobasynyń keri áseri joq. Zań jobasyn qabyldaý apattardyń qaýip-qaterin tómendetýge jáne taraptardyń aýmaǵynda tabıǵı, tehnogendi sıpattaǵy tótenshe jaǵdaıdyń saldaryn azaıtýǵa múmkindik beredi», - dedi mınıstr.