Kólik mınıstri Marat Qarabaev latvıalyq áriptesi Kaspars Brıshkenspen kezdesti.
Kezdesý barysynda taraptar Qazaqstan men Latvıadaǵy kólik salasynyń qazirgi jaǵdaıy men damý perspektıvalary týraly pikir almasyp, Transkaspıı halyqaralyq kólik baǵytyn damytý týraly Memorandýmǵa qol qoıdy, dep habarlaıdy Almaty-akshamy.kz Kólik mınıstrligine silteme jasap.
«Búgingi tańda Qazaqstan men Latvıa kólik-tranzıttik yntymaqtastyqty belsendi damytyp jatyr. Yntymaqtastyqtyń mańyzdy aspektileriniń biri – kólik máseleleri boıynsha turaqty negizde jumys isteıtin birlesken jumys toby. Atalǵan top jumys barysynda temirjol, avtomobıl, áýe kóligi, tranzıt jáne logıstıka salasyndaǵy kóptegen mańyzdy suraqty qamtıdy», – dep atap ótti mınıstrlik basshysy.
Mınıstrdiń aıtýynsha, búginde Transkaspıı halyqaralyq kólik baǵytynyń atqaryp otyrǵan róli erekshe. Ótken jyldyń qorytyndysy boıynsha júkterdi tasymaldaý kóleminiń eki ese artýy osynyń birden-bir dáleli.
«Transkaspıı halyqaralyq kólik baǵytynyń áleýetin arttyrý maqsatynda ınfraqurylymdy jáne termınaldyq qýattardy jaqsartý, port qýattaryn keńeıtý, jyljymaly quramdy ulǵaıtý, ákimshilik kedergilerdi alyp tastaý jáne tasymaldaýshylar úshin qolaıly jaǵdaılar jasaý boıynsha jumystar júrgizilip jatyr. Bul 2025 jylǵa qaraı halyqaralyq kólik baǵytynyń ótkizý qabiletin jylyna 10 mln tonnaǵa deıin ulǵaıtýǵa múmkindik beredi», – dedi salalyq mınıstrliktiń basshysy.
Aıta keterligi, búgingi tańda Latvıa Avstrıa, Germanıa, Lıtva, Estonıa jáne Vengrıamen birge TMTM-ge kirýge qyzyǵýshylyq tanytyp otyr. Osy rette halyqaralyq kólik baǵytynyń halyqaralyq qaýymdastyǵy sheńberinde Ázerbaıjan, Grýzıa jáne Túrkıamen 2027 jylǵa deıingi Jol kartasyna qol qoıyldy. Resmı sapar aıasynda osy jyldyń 31 qańtarynda Rýmynıamen de memorandýmǵa qol qoıylǵan bolatyn.
Sóz kezeginde beıindi mınıstrliktiń basshysy latvıalyq ınvestorlardy ınfraqurylymdyq jobalardy birlesip iske asyrýǵa shaqyrdy.
«Biz tranzıttik júk aǵyndarynyń kólemin ózara ulǵaıtý, kólik marshrýttaryn belgileý jáne damytý, mýltımodaldy tasymaldaý jáne logıstıkalyq prosester salasyndaǵy ozyq tájirıbelermen almasý úshin kólik jáne logıstıka salasyndaǵy yntymaqtastyqty nyǵaıtýǵa daıynbyz», – dep túıindedi M.Qarabaev.
Sapar aıasynda qazaqstandyq delegasıa salynyp jatqan Rail Baltica obektisine men Rıga portyna bardy. Sonymen birge jumys sapary aıasynda Marat Qarabaev Qazaqstan-Latvıa bıznes-forýmynda kólik salasyndaǵy yntymaqtastyq týraly baıandama jasap, Rıga porty basqarmasynyń basshylyǵymen jáne jergilikti bıznes ókilderimen ekijaqty kezdesýler ótkizdi.