Kýveıt pen Qazaqstan qazirgi tańda ózara qurmet pen tıimdilik ustanymdaryna negizdelgen kópqyrly syrtqy saıasat júrgizip keledi.
Bıyl damýdyń dańǵyl jolyna túsken Islam elderiniń biri Kýveıt pen Qazaqstannyń dıplomatıalyq qatynastardyń ornaǵanyna otyz jyl toldy, dep habarlaıdy Almaty-akshamy.kz Egemen.kz-ke silteme jasap.
«Eldestirmek elshiden» demekshi, ekijaqty baılanys ornatyp, barlyq deńgeıdegi qarym-qatynasty jolǵa qoıýǵa qyzmet júrgen Kýveıttiń Qazaqstandaǵy Tótenshe jáne ókiletti elshisi, doktor Omar ál-Kandarı eki el arasyndaǵy yntymaqtastyqty damytýdyń odan arǵy keleshegine qatysty oıymen bólisken edi.
«Kýveıt pen Qazaqstan arasyndaǵy ortaq rýhanı qundylyqtar, sondaı-aq strategıalyq seriktestikke negizdelgen qarym qatynastar birlesken kúsh-jigerdiń arqasynda dáıekti túrde damı beretinine senimdimin. Jalpy Kýveıt pen Qazaqstandy dıplomatıalyq qatynastar ǵana emes, tarıhı jáne dinı qatynastar da baılanystyrady. Eger jalpy qazaq-arab qatynastaryn alsaq, onda kóptegen ıslam ǵalymdary osy aımaqtan, mysaly, Ál-Farabı jáne basqalary shyqqanyn atap ótýge bolady. Sondaı-aq Sultan Beıbarys bizdi saıası jáne áskerı salada baılanystyrady, óıtkeni ol Egıpettiń bıleýshisi ári áskerı jetekshisi boldy», - deıdi elshi.
Byltyrǵy 24 naýryzda Qazaqstannyń Syrtqy ister mınıstri Muhtar Tileýberdiniń Kýveıt memleketine issapary Kýveıt-Qazaqstan arasyndaǵy ekonomıkalyq jáne saýda yntymaqtastyq máselelerin taǵy bir deńgeıge kótergeni anyq. İssapar barysynda birlesken komıtettiń 3 otyrysy uıymdastyryldy. Kelesi tórtinshi basqosý jaqynda Kýveıt memleketinde ótedi.
Kýveıt memleketi óńirlik uıymdar sheńberinde, ásirese, Ortalyq Azıa Strategıalyq dıalogy (GR5) jáne Parsy shyǵanaǵy elderiniń yntymaqtastyq keńesi (PSHEYK) sheńberinde Qazaqstan Respýblıkasymen yntymaqtastyqty nyǵaıtýǵa erekshe mán beredi.
Onyń ústine, Kýveıt memleketi Qazaqstan Respýblıkasy tóraǵalyǵynyń qoldaýymen 2022 jylǵy qazanda AÓSSHK konferensıasynyń altynshy samıti barysynda Azıadaǵy ózara yqpaldastyq jáne senim sharalary jónindegi keńeske tolyqqandy múshe retinde qosyldy. Bul týraly «Azıadaǵy ózara yqpaldastyq jáne senim sharalary jónindegi keńesine Kýveıt eliniń 28-shi múshe memleket retinde kirýin quptaımyn. Bul AÓSSHK ózektiligin jáne Azıadaǵy dıalog pen yntymaqtastyqty odan ári nyǵaıtý qajettigin taǵy bir ret kórsetti», degen bolatyn Qazaqstan Prezıdenti Qasym-Jomart Toqaev AÓSSHK VI samıtiniń ashylýynda.
Sonymen qatar Kýveıt memleketi eki el arasyndaǵy ınvestısıalyq jáne týrısik yntymaqtastyqty jandandyrýǵa erekshe nazar aýdarady. Osyǵan baılanysty Kýveıt pen Almaty qalasy arasynda tikeleı reıster qatynaıdy, al Astanada Kýveıt Elshiligi ashylǵan sátten bastap Kýveıt memleketinen Qazaqstan Respýblıkasyna keletin týrıserdiń sany artqany baıqalady.
«Mádenıet salasynda Astana Opera ókilderiniń Kýveıt memleketine barǵan saparyn atap ótý qajet, onda olar Kýveıt halqyn qazaq mádenıetimen etene jaqyn tanystyrdy. Álbette, Kýveıttiń ulttyq mádenı keńesi Qazaqstanmen osy saladaǵy qarym-qatynasyn nyǵaıtýǵa nıetti. Onyń ústine bilim salasy da nazardan tys qalmady. Elshilik deńgeıinde biz jergilikti ýnıversıtettermen qarym-qatynas ornatýǵa tyrysamyz. Mysaly, burynǵy Elshi Tarek ál-Faradjdyń kezinde KAZGúÝ-da «Kýveıt memleketi» aýdıtorıasy ashyldy, bıyl biz ol jerge Kýveıt mádenıeti týraly jazylǵan kitaptardy tartý ettik. Eýrazıa ulttyq ýnıversıtetimen baılanysymyz tyǵyz. Dúnıejúzilik arab tili kúnin atap ótemiz, mádenı is-sharalar uıymdastyramyz», - dedi Kýveıttiń Qazaqstandaǵy Tótenshe jáne ókiletti elshisi, doktor Omar ál-Kandarı.