Memleket basshysy Kongo Demokratıalyq Respýblıkasy prezıdentiniń elimizge alǵashqy saparyn tarıhı sát retinde atap ótip, onyń Astanaǵa úlken delegasıamen kelýin qazaq halqyna kórsetken zor qurmet dep baǵalady, dep habarlaıdy Aqshamnews.kz tilshisi Aqordaǵa silteme jasap.
"Dıplomatıalyq qatynastardyń ornaǵanyna kóp ýaqyt bola qoıǵan joq. Soǵan qaramastan ózara senim men dostyqqa negizdelgen yntymaqtastyq damyp keledi. Búgingi kelissózder Astana men Kınshasa arasyndaǵy baılanysty jańa beleske kóteredi, tıimdi áriptestik ornatýǵa múmkindik beredi. Kongo Demokratıalyq Respýblıkasy – Qazaqstannyń Afrıkadaǵy mańyzdy seriktesi. Eki el arasyndaǵy qarym-qatynastyń keleshegi zor dep oılaımyn", – dedi Qasym-Jomart Toqaev.
Memleket basshysy búgingi ýaǵdalastyqtar men qol qoıylǵan qujattar ózara tıimdi yqpaldastyqqa tyń serpin beretinine senim bildirdi. Sonymen qatar seriktestiktiń qarqynyn óz deńgeıinde saqtaý úshin eki eldiń syrtqy saıasat vedomstvolary arasyndaǵy turaqty ári iskerlik baılanysty jandandyrýǵa shaqyrdy.
Qasym-Jomart Toqaevtyń aıtýynsha, saýda-ekonomıkalyq yntymaqtastyq ekijaqty kún tártibiniń basym baǵyty bolýy kerek. Prezıdent Qazaqstan men Kongo Demokratıalyq Respýblıkasynyń tabıǵı resýrstarǵa baı ári ekonomıkalyq múmkindigi mol ekenine nazar aýdaryp, eki el ózara tıimdi jobalardy iske asyrýda senimdi seriktes bola alatynyn jetkizdi.
Memleket basshysy asa mańyzdy shıkizat materıaldary salasyndaǵy KDR-dyń áleýetine joǵary baǵa berip, bul eldiń biregeı tabıǵı resýrstary jahandyq jetkizý tizbeginde mańyzdy ról atqaratynyn atap ótti.
Álemdegi kobált óndirisiniń 76 paıyzy, mystyń 14 paıyzy, qalaıynyń 8,3 paıyzy, tantaldyń 42 paıyzy, koltannyń 40 paıyzy Kongo Demokratıalyq Respýblıkasyna tıesili. Sonymen qatar joǵary tehnologıalyq salalarǵa qajetti basqa da strategıalyq mıneraldardyń mol qory bar.
Prezıdent Kongo basshylyǵynyń qoldaýymen qazaqstandyq ERG kompanıasy atalǵan elde tabysty jumys istep jatqanyn aıtty.
Al Felıks Chısekedı Kongonyń ózara yntymaqtastyqty tereńdetýge daıyn ekenin jetkizdi
"Bizdiń memleketterimiz geografıalyq turǵydan bir-birinen alshaq ornalassa da, halyqtarymyzdy egemendik pen terıtorıalyq tutastyqty qurmetteý, dıalog arqyly beıbitshilikke úndeý sekildi ortaq qundylyqtar biriktiredi. Kongo Demokratıalyq Respýblıkasy halyqaralyq qoǵamdastyqtyń, sonyń ishinde Qazaqstannyń eń qıyn sátterde kórsetken qoldaýyn eshqashan umytpaıdy. Qazaqstan BUU aıasyndaǵy belsendi ustanymymen Kongo halqyna janashyr ekenin dáleldedi. Sondyqtan Sizge shynaıy rızashylyǵymyzdy bildirýge ruqsat etińiz", – dedi KDR Prezıdenti.
Felıks Chısekedıdiń aıtýynsha, Qazaqstan ıadrolyq qarýdan bas tartý jáne beıbitshilikti saqtaý úshin dáıekti dıalogty ilgeriletý arqyly qaýipsizdik pen damýdyń óte mańyzdy ekenin kórsetti. Bul – álem jurtshylyǵyna úlgi. Kelissóz barysynda ekijaqty saýdany damytý, kólik-logıstıka, taý-ken, aýyl sharýashylyǵy jáne aqparattyq tehnologıalar, sıfrlandyrý salalaryndaǵy yqpaldastyq máselelerine basa mán berildi.