Tegeran qalasynda Qazaqstan men Iran arasyndaǵy saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi úkimetaralyq komısıanyń 19-shy otyrysy ótti.
Qazaqstan Premer-Mınıstriniń orynbasary Serik Jumanǵarın men Iran aýyl sharýashylyǵy mınıstri Mohammad Alı Nıkbahttyń teń tóraǵalyǵymen ótken sharaǵa eki el mınıstrlikteri men memlekettik kásiporyndarynyń ókilderi qatysty, dep habarlaıdy Almaty-akshamy.kz
Úkimetaralyq komısıa otyrysynda taraptar saýda, aýyl sharýashylyǵy, logıstıka, energetıka, densaýlyq saqtaý, bilim berý, týrızm jáne basqa da salalardaǵy memleketaralyq qatynastardyń tabysty damyp kele jatqanyn atap ótti.
Serik Jumanǵarın eki memlekettiń basshylary Qazaqstan men Iran arasyndaǵy taýar aınalymyn úsh mıllıardtyq mejege jetkizý mindetin qoıǵanyn eske saldy.
«Osy tapsyrmany oryndaýdyń alǵashqy qadamy Ózara taýar aınalymyn $3 mlrd-qa jetkizý jónindegi is-sharalar josparyna qol qoıý bolady. Qujat eksporttaýshy kásiporyndardy birneshe baǵytta qoldaýdy kózdeıdi: ózara saýda kólemin ulǵaıtý, saýda-sattyqtaǵy shekteýlerdi alyp tastaý, ekijaqty klırıń mehanızmin engizý jáne t.b.», —dedi vıse-premer. Ol sondaı-aq qazaqstandyq kompanıalar Iran naryǵyna shıkizattyq emes taýarlardyń úzdiksiz eksportyn jolǵa qoıýǵa múddeli ekenin aıtty.
Óndirýshiler ırandyq tutynýshylarǵa jalpy somasy shamamen $250 mln bolatyn 75 taýar pozısıasy boıynsha ónim jetkizýge daıyn.
Sonymen qatar otyrys barysynda Serik Jumanǵarın EAEO-ǵa múshe memleketter men Iran arasynda erkin saýda týraly tolyqqandy kelisim jasasýda elderdiń qol jetkizgen jetistikterine oń baǵa berdi.
Irannyń aýyl sharýashylyǵy mınıstri Mohammad Alı Nıkbahttyń aıtýynsha, ırandyq kásiporyndar Qazaqstanǵa balyq jáne sút ónimderi, bal, jemister men kókónister, keptirilgen jemister jáne basqa da azyq-túlik ónimderin jetkizýdi uıymdastyra alady. Sondaı-aq ırandyq tarap qazaqstandyq ınvestısıaǵa qyzyǵýshylyq tanytty. Tegeran Qazaqstannan kelgen ınvestorlarǵa Irannyń erkin ekonomıkalyq aımaqtarynda bıznes júrgizý úshin erekshe jaǵdaılar jasaýǵa daıyn.
Oǵan qosa Úkimetaralyq komısıa aıasynda kólik-logıstıkalyq yntymaqtastyqty odan ári keńeıtý máselesi talqylandy. Atap aıtqanda, Soltústik-Ońtústik halyqaralyq kólik dálizderin damytý qaraldy. Kaspıı toraby bul baǵyttaǵy negizgi býynǵa aınalýy múmkin.
Qazaqstan Premer-Mınıstriniń orynbasary Tegeranǵa jumys sapary barysynda aýyl sharýashylyǵy, turǵyn úı-kommýnaldyq sharýashylyq, ınvestısıa, taý-ken jáne metalýrgıa ónerkásibi, ónerkásip jáne kólik salalaryndaǵy jetekshi ırandyq kásipkerlermen kezdesti.
Plenarlyq otyrys sońynda Qazaqstan Premer-Mınıstriniń orynbasary Serik Jumanǵarın men Irannyń aýyl sharýashylyǵy mınıstri Mohammad Alı Nıkbaht Qazaqstan Respýblıkasy men Iran Islam Respýblıkasy arasyndaǵy 19-shy birlesken úkimetaralyq komısıanyń hattamasyna jáne Taýar aınalymyn $3 mlrd-qa deıin jetkizý jónindegi is-sharalar josparyna qol qoıdy.
Sonymen qatarúkimetaralyq komısıanyń qorytyndysy boıynsha aýyl sharýashylyǵy jáne metrologıa salalaryndaǵy qujattarǵa qol qoıyldy:
-
Qazaqstan men Irannyń Aýyl sharýashylyǵy mınıstrlikteri arasyndaǵy veterınarıa salasyndaǵy yntymaqtastyq týraly memorandým.
-
Qazaqstan standarttaý jáne metrologıa ınstıtýty men Irannyń Ulttyq standarttaý uıymy Ulttyq metrologıa ortalyǵy arasyndaǵy metrologıa salasyndaǵy ózara túsinistik týraly memorandým.
Tegeranǵa jumys sapary barysynda Qazaqstannyń vıse-premeri Irannyń aýyl sharýashylyǵy, TKSH, ınvestısıalar, TMK, ónerkásip jáne kólik salasyndaǵy kóshbasshy bıznesmenderimen kezdesti.