Oljas Bektenov Fufeng Group basshysy Lı Súechýnmen aýyl sharýashylyǵy ónimderin tereń óńdeý jobasyn talqylady
Qazaqstan Premer-mınıstri Oljas Bektenov Qytaıdyń Fufeng Group kompanıasynyń basqarma tóraǵasy Lı Súechýnmen agroónerkásip jáne kómir hımıasy salasyndaǵy yntymaqtastyqty talqylady. Kezdesýde tereń óńdeýge jáne uzaqmerzimdi ınvestısıalyq seriktestikke erekshe nazar aýdaryldy.
Fufeng Group Company Limited – amınqyshqyldary men olardyń týyndylaryn óndirýge, sondaı-aq osy saladaǵy zertteýler men ázirlemelerge mamandanǵan bıo-fermentteý ındýstrıasyndaǵy álemdik kóshbasshy. Kompanıa natrıı glýtamaty men ksantan shaıyrynyń álemdegi eń iri óndirýshileriniń biri sanalady.
Kezdesý barysynda Fufeng Group-tyń Qazaqstanda krahmaldy qant pen amınqyshqyldaryn óndirý zaýyttaryn, kómir jylý elektr stansasy men aǵyndy sýlardy tazartý stansasyn qamtıtyn júgerini tereń óńdeýge arnalǵan óndiristik park qurý týraly usynysy talqylandy.
Bıdaı men júgerini tereń óńdeý qosylǵan quny joǵary ónimder – krahmal, amınqyshqyldary, natrıı glýtamaty jáne ksantan shaıyrynyń óndirisin qamtamasyz etedi. Bul ónimder shıkizat baǵasynan 10-15 ese joǵary turady. Joba aıasynda 1 myń jańa jumys orny ashylmaq, al ınvestısıa kólemi shamamen $300-350 mln-dy quraıdy.
Lı Súechýn kompanıanyń aýyl sharýashylyǵy daqyldaryn ósirý, sapaly tyńaıtqyshtarmen qamtamasyz etý jáne qazaqstandyq mamandarmen zamanaýı agrotehnologıalar boıynsha tájirıbe almasýǵa daıyn ekendigin aıtty. Sondaı-aq ol kómir-hımıa salasyndaǵy yntymaqtastyqqa qyzyǵýshylyq bildirdi.
Qazaqstan Premer-mınıstri Memleket basshysynyń ekonomıkany ósirýge arnalǵan maqsattary aıasynda agroónerkásip keshenine ınvestısıa quıýdyń mańyzdylyǵyn atap ótti.
«Qazaqstan qosylǵan quny joǵary ónimder óndirisin damytýǵa umtylýda, al astyqty tereń óńdeý keshenderin salý – bizdiń basym baǵyttarymyzdyń biri. Bul ekonomıkany ártaraptandyrýǵa jáne eksport múmkindikterin keńeıtýge múmkindik beredi. Bizde ınfraqurylym, shıkizat jáne memlekettik qoldaý bar. Joba agroónerkásip sektorynda qosymsha qun qurýdyń jáne ozyq tehnologıalar engizýdiń jarqyn úlgisi bolady. Úkimet tarapynan qajetti qoldaý kórsetiledi», — dedi Oljas Bektenov.
Qazaqstan naryǵynda Fufeng Group sıaqty iri oıynshynyń kelýi aýyl sharýashylyǵy daqyldaryn, ásirese soltústik aımaqtarda astyq egýdi ártaraptandyrýǵa yqpal etedi. Kompanıanyń qazaqstandyq fermerlermen josparly offteık-kelisimsharttar jasaýy tıimdi yntymaqtastyqty qamtamasyz etedi.
Kezdesý qorytyndysynda Premer-mınıstr Aýyl sharýashylyǵy, Ónerkásip jáne qurylys mınıstrlikterine Fufeng Group kompanıasymen ınvestısıalyq kelisimdi jedeldetip daıyndaý jóninde tapsyrma berdi.