Aqtaý ákimdigi jańa jyldyq bezendirý úshin 20 metrlik eki jasandy shyrsha satyp alýǵa nıetti.
Tapsyrys berýshi — Aqtaý qalalyq turǵyn úı-kommýnaldyq sharýashylyq bólimi, dep habarlaıdy aqshamnews.kz. Bul maqsatqa búdjette 98 403 854,00 teńge qarastyrylǵan. Oǵan mereke atrıbýttaryn jetkizý men ornatý kiredi.
Shyrshalar jasyl tústi, konýstyq pishindi, bıiktigi 20 metr. Negiziniń dıametri — 7,4 metr, bolat qańqanyń salmaǵy — keminde 2 000 kılogramm, qylqan japyraqtardyń salmaǵy — keminde 950 kılogramm. Shyrshalar gırlándalar men sharlarmen, sondaı-aq jaryqdıody bar sándik arkamen bezendiriledi. Ornatý ornyn tapsyrys berýshi anyqtaıdy delingen qujatta. Budan basqa, qalada birneshe jańajyldyq oryn paıda bolady: 15 shaǵyn aýdannyń jaǵalaýy, 11 shaǵyn aýdandaǵy Yntymaq alańy men 19A shaǵyn aýdandaǵy Ábish Kekilbaev murajaıynyń aýmaǵyndaǵy alań. Olar jańa shaǵyn sáýlet nysandarymen: buǵymen (6 birlik) jáne jaryq arkasymen (2 birlik) bezendiriletin bolady.
Ornatý 2024 jyldyń 17-24 jeltoqsany aralyǵynda júrgizý josparlanǵan. Bólshekteý — 2025 jylǵy 15 qańtar.