Qazaqstan Respýblıkasy Syrtqy ister mınıstriniń orynbasary Roman Vasılenko Eýropalyq Komısıanyń Halyqaralyq áriptestik jónindegi bas dıreksıasynyń Taıaý Shyǵys, Azıa jáne Tynyq muhıty isteri jónindegi dırektory Peterıs Ýstýbpen kezdesý ótkizdi.
Suhbat barysynda taraptar sıfrlyq transformasıa jáne óńirlik ózara baılanys salasynda is-qımyldy nyǵaıtýǵa basa nazar aýdaryp, qazaq-eýropalyq yntymaqtastyqtyń keń aýqymdy máselelerin talqylady, dep habarlaıdy aqshamnews.kz Syrtqy ister mınıstrligine silteme jasap.
Mınıstrdiń orynbasary Qazaqstan men Eýropalyq odaq arasyndaǵy saıası baılanystardyń joǵary serpinin quptap, ózara múddeli máseleler boıynsha yntymaqtastyqty nyǵaıtýdyń mańyzyn atap ótti.
Bul turǵyda R.Vasılenko Ortalyq Azıadaǵy sıfrlyq ekonomıkany damytýǵa, sonyń ishinde aýyldyq aımaqtarda spýtnıktik baılanys arqyly qaýipsiz ınternetke qol jetkizýdi qamtamasyz etýge baǵyttalǵan «Team Europe Initiative on Digital Connectivity» bastamasyna qoldaý bildirdi.
Suhbattastar kólik-logıstıka salasyndaǵy yqpaldastyqty odan ári damytýdyń mańyzyn atap ótip, Transkaspıı halyqaralyq kólik baǵytyn (THKB) damytý boıynsha úılestirý platformasynyń belsendi jumysyn quptady.
Kezdesý qorytyndysy boıynsha atalǵan salalardaǵy yntymaqtastyqty jalǵastyrý týraly kelisimge qol jetkizildi.
Anyqtama: Qazaqstan men EO arasynda Keńeıtilgen áriptestik jáne yntymaqtastyq týraly kelisimge qol qoıylyp, ratıfıkasıalanǵan. Atalǵan qujat saýda, ınvestısıa, ınfraqurylymdy damytý, sondaı-aq ınovasıalar, mádenıet, sport jáne týrızm máselelerin sekildi ózara is-qımyldyń 29 salasyn qamtıdy.
Byltyr Eýroodaqpen taýar aınalymy 3,5%-ǵa ósip, 41,4 mlrd AQSH dollaryn qurady. 2005 jyldan beri Qazaqstan ekonomıkasyna eýropalyq ınvestısıalardyń kólemi 180 mlrd dollardan asty. Qazaqstanda eýropalyq kapıtaldyń qatysýymen 3 myńnan astam kompanıa jumys isteıdi, sonyń ishinde «Shell», «Sneider», «Eni», «Total», «Air Liquide», «Alstom», «Siemens» jáne t.b. transulttyq korporasıalar bar.
Jalpy somasy 300 mlrd eýrodan astam qarjy bólingen «Global Gateway» bastamasy aıasynda Eýropalyq odaq Qazaqstanda ınfraqurylymdyq, atap aıtqanda, THKB-ny damytýǵa baǵyttalǵan jobalardy júzege asyrýǵa nıetti.