Qazaqstan Respýblıkasynyń Ázerbaıjandaǵy Elshisi Álim Baıel Ázerbaıjan Respýblıkasynyń ekonomıka mınıstri Mıkaıl Djabbarovpen kezdesti. Taraptar saýda-ekonomıka, ınvestısıa, kólik-logıstıka, energetıka jáne qurylys salalaryndaǵy ekijaqty yntymaqtastyqtyń qazirgi jaǵdaıy men perspektıvalaryn talqylady.
Álim Baıel eki el arasyndaǵy taýar aınalymynyń turaqty ósip kele jatqanyn atap ótti. Bıylǵy jyldyń alǵashqy tórt aıynda bul ósim 20% qurady. Ásirese, 2025 jyly Qazaqstannyń alǵash ret Ázerbaıjanǵa negizgi bıdaı jetkizýshige aınalyp, osy eldiń astyq ımportynyń 88% qamtamasyz etkeni úlken qanaǵat sezimin týdyrady.
Óz kezeginde Mıkaıl Djabbarov Qazaqstanmen ekonomıkalyq yntymaqtastyqty damytý Ázerbaıjan úshin strategıalyq mańyzǵa ıe ekenin atap ótti. Osy oraıda ol Transkaspıı halyqaralyq kólik baǵyty (THKB), Kaspıı teńiziniń túbimen talshyqty-optıkalyq baılanys jelisin (TOBJ) tartý, Qazaqstannyń energıa resýrstaryn Ázerbaıjan arqyly tasymaldaý jáne Kaspıı teńiziniń túbimen elektr kabelin tartý syndy iri birlesken jobalardyń iske asyrylýyn joǵary baǵalady. Bul jobalar geoekonomıkalyq turǵydan búkil óńir úshin mańyzdy.
Elshi Á. Baıel Qazaqstan basshylyǵy Ázerbaıjanmen ónerkásiptik kooperasıany damytýǵa erekshe kóńil bólip otyrǵanyn jetkizdi. Osy turǵyda ol Qazaqstanda ınfýzıalyq eritindilerdi birlesip óndirýdi jolǵa qoıýdy usyndy. Sonymen qatar, Álim Baıel Ázerbaıjan tarapyna Alakól jaǵalaýynda saýyqtyrý-kýrorttyq keshenin salýdy usyndy. M. Djabbarov bul bastamalar boıynsha yntymaqtastyqqa daıyn ekenderin bildirdi. Taraptar jobalardy iske asyrýdyń tetikterin talqylady.
Sondaı-aq, taraptar turǵyn úı men áleýmettik nysandar salý baǵytynda qurylys kompanıalarynyń qyzmetin keńeıtý máselesin talqylady. Qazir Qazaqstannyń birqatar kompanıasy Ázerbaıjanda medısınalyq jáne turǵyn úı nysandaryn salýdy bastap ketkeni rızashylyqpen atalyp ótti. Qazaqstan aýmaǵynda da osy baǵyttaǵy yntymaqtastyq múmkindikteri qarastyrylyp jatyr.