Elektrsamokat aıdaıtyndarǵa eskertý: qandaı erejeler men aıyppuldar bar?

Keıingi jyldary Almaty kóshelerinde elektrsamokatpen júretinder sany kúrt artty. Ýaqytty únemdeýdiń, keptelisten qashýdyń jáne ekologıalyq kólikti tańdaýdyń yńǵaıly joly retinde tanylǵan bul kólik túrine qatysty qazir naqty erejeler qalyptasyp jatyr. Degenmen, kóp júrgizýshi zań talaptaryn tolyq bilmeıdi. Aqshamnews.kz bul kólik quralyn tizgindeıtinderge qandaı jaǵdaıda aıyppul salynatyny týraly aıtady.

Elektrsamokat kólik quraly ma?

2023 jyly Qazaqstanda elektrsamokattyń jol qozǵalysyna qatysty mártebesi zańmen bekitildi. Demek, ony basqarý úshin belgili bir talaptar bar.

Jol qozǵalysy erejeleri qandaı?

1. Jas shekteýi: elektrsamokatty 18 jastan asqan azamattar ǵana aıdaı alady.

2. Júrgizýshi kýáligi bolýy kerek: elektrsamokatty kólik júretin jol boıymen aıdasańyz, júrgizýshi kýáligińiz bolýy kerek. 

3. Jyldamdyq shekteýi:

   • Jolda: 25 km/saǵ deıin,

   • Trotýar men jaıaý júrginshi jolynda: 6 km/saǵ aspaý kerek.

4. Qaı jerde júrýge bolady?

   • Birinshi kezekte velosıped jolymen júrý mindetti.

   • Eger velosıped joly bolmasa, joldyń oń jaq shetimen qozǵalýǵa ruqsat etiledi.

5. Tyıym salynǵan áreketter:

   • Qosymsha adam otyrǵyzý,

   • Aýyr júk alyp júrý,

   • Rúldi bir qolmen ustaý,

   • Túnde jaryq shaǵylystyrǵysh kıimsiz júrý,

   • Qaýipsizdik kaskasyn kımeý.

Qaýipsizdik úshin keńester

• Kaska kıińiz – bul jaraqat alý qaýpin edáýir azaıtady.

• Jolda júrgende – velosıped jolaǵyn tańdańyz.

• Qarańǵyda shaǵylystyrǵysh beldik, kıim nemese fara paıdalanǵan jón.

• Jaıaý júrginshiler arasynda júrmeńiz, qajet bolsa, samokattan túsip, jaıaý ótińiz.

Aıyppul qandaı?

Elektrsamokat júrgizýshileri zań buzǵan jaǵdaıda Ákimshilik quqyqbuzýshylyq týraly kodeks aıasynda jaýapkershilikke tartylady.

• Qoǵamdyq tártipti buzý, jol erejesin saqtamaý nemese basqa azamattardyń qaýipsizdigine qaýip tóndirý – 5 AEK mólsherinde aıyppul (2025 jyly - shamamen 17 250 teńge).

• Qaladaǵy jalǵa beriletin samokattardy turaqqa durys qoımaý:

  • 1-ret – eskertý nemese 100 teńge,

  • 2-ret – 1 000 teńge,

  • 3-ret – 3 000 teńge,

  • 4 jáne odan keıingi jaǵdaılarda – 10 000 teńge.

Aıta keteıik, Almatyda quqyq qorǵaý organdary tarapynan elektrsamokat aıdaýshylarǵa qatysty reıdter jıilep keledi. 

Keıingi derekke sáıkes, samokattar 127 jol apatyna sebepshi bolǵan. Budan 133 adam zardap shekken.